ఫిబ్రవరి 19 నుంచి ఛాంపియన్స్ ట్రోఫీ ప్రారంభం కానుంది. ఈ టోర్నీలో మొత్తం ఎనిమిది దేశాలు పోటీపడనున్నాయి. పాకిస్థాన్ ఈ టోర్నీకి ఆతిథ్యం ఇస్తుండగా, భారత్ ఆడే మ్యాచ్‌లు దుబాయ్‌లో జరగనున్నాయి. ఈ నేపథ్యంలో ఛాంపియన్స్ ట్రోఫీ గెలుపుపై క్రికెట్ దిగ్గజం సునీల్ గవాస్కర్ తన విశ్లేషణను అందించారు.
ఈ టోర్నీలో పోటీ తీవ్రంగా ఉన్నప్పటికీ, హోమ్ అడ్వాంటేజ్ ఉన్న పాకిస్థాన్ కే గెలిచే అవకాశాలు ఎక్కువగా ఉన్నాయని గవాస్కర్ తెలిపారు. గతంలో పాక్ జట్టు తమ స్వదేశంలో అద్భుతమైన ప్రదర్శన కనబరిచిందని, ఇలాంటి మెగా టోర్నీలో మరింత ప్రభావం చూపుతుందని పేర్కొన్నారు. ఛాంపియన్స్ ట్రోఫీలో హాట్ ఫేవరెట్ ట్యాగ్ పాకిస్థాన్‌కే ఇవ్వాలని అభిప్రాయపడ్డారు.
గత వన్డే ప్రపంచకప్‌లో టీమిండియా ఫైనల్‌కు వెళ్లినప్పటికీ చివరి అంకంలో ఓడిపోయిందని గవాస్కర్ గుర్తుచేశారు. అయితే ఆ టోర్నీలో భారత్ వరుసగా విజయాలు సాధించిందని, ఇదే స్ఫూర్తితో పాకిస్థాన్ కూడా ఇంట్లో తిరుగులేని జట్టుగా నిలుస్తుందని అన్నారు. హోం కండీషన్స్‌లో పాక్‌ను ఓడించడం అంత సులభం కాదని గవాస్కర్ అభిప్రాయపడ్డారు.
ఒకవేళ భారత్ తమ అత్యుత్తమ ఆటతీరును కనబరిస్తే కఠినమైన పోటీ ఇవ్వగలదని చెప్పారు. అయితే, ప్రస్తుత కండీషన్స్‌లో పాకిస్థాన్‌కే ట్రోఫీ గెలిచే అవకాశాలు అధికంగా ఉన్నాయని స్పష్టం చేశారు. టోర్నీలో అన్ని జట్లు శక్తివంతమైనవే అయినప్పటికీ, హోమ్ గ్రౌండ్‌లో ఆడే జట్టుకు ఎక్కువ అవకాశాలు ఉంటాయని గవాస్కర్ తన విశ్లేషణలో తెలిపారు.
