హోలీ పండుగను బాధ్యతాయుతంగా, సురక్షితంగా జరుపుకోవాలని ములుగు జిల్లా ఎస్పీ డా. శబరిష్.పి, ఐపీఎస్ సూచించారు. హోలీ సందర్భంగా జిల్లా పోలీస్ శాఖ తరపున ప్రజలకు పలు మార్గదర్శకాలు అందించారు. హోలీ వేడుకలు 14-03-2025 న ఉదయం 6:00 గంటల నుంచి మధ్యాహ్నం 12:00 గంటల వరకు జరుపుకోవాలని, ఆ తర్వాత కుటుంబ సభ్యులతో సమయాన్ని ఆనందంగా గడపాలని కోరారు.
హోలీ సందర్భంగా చర్మానికి మరియు పర్యావరణానికి హానికరం కాని సహజ రంగులను మాత్రమే ఉపయోగించాలని, నీటి బెలూన్లు లేదా గాజు పొడి కలిపిన రంగులు వాడకూడదని తెలిపారు. ఇతరుల అనుమతి లేకుండా బలవంతంగా రంగులు వేయడం, అసభ్యంగా ప్రవర్తించడం కఠినంగా నేరంగా పరిగణించబడుతుందని హెచ్చరించారు.
మద్యం సేవించి వాహనం నడపరాదని, డ్రంకెన్ డ్రైవింగ్ వల్ల తీవ్రమైన ప్రమాదాలు జరిగే అవకాశం ఉందని ఎస్పీ హెచ్చరించారు. ద్విచక్ర వాహనాలను సమూహాలుగా తరలించడం, వీధుల్లో అల్లర్లు చేయడం నిషేధించబడుతుందని, హోలీ సందర్భంగా శాంతి భద్రతలకు భంగం కలిగించే చర్యలు పాల్పడితే చట్టపరమైన చర్యలు తప్పవని స్పష్టం చేశారు.
ఏదైనా అత్యవసర పరిస్థితిలో 100 నంబర్‌కు కాల్ చేయాలని సూచించారు. హోలీ పండుగ ప్రేమ, ఐక్యత, సంతోషాన్ని విస్తరించేలా జరుపుకోవాలని, ప్రజలందరికీ ఈ పండుగ శాంతి, ఆనందం, సమృద్ధిని తీసుకురావాలని ఎస్పీ ఆకాంక్షించారు.
