గుజరాత్ టైటాన్స్ బౌలర్ ఇషాంత్ శర్మకి ఐపీఎల్ మ్యాచ్‌లో ప్రవర్తనా నియమావళిని ఉల్లంఘించినందుకు జరిమానా విధించారు. హైదరాబాద్‌తో జరిగిన మ్యాచ్ సందర్భంగా అతని చర్యలపై బీసీసీఐ అధికారిక ప్రకటన విడుదల చేసింది. మ్యాచ్ ఫీజులో 25 శాతం కోతతో పాటు ఒక డీమెరిట్ పాయింట్‌ను అతని ఖాతాలో చేర్చారు. ఇది ఐపీఎల్ కోడ్ ఆఫ్ కండక్ట్‌ కింద లెవల్ 1 ఉల్లంఘనగా పేర్కొన్నారు.
ఆర్టికల్ 2.2 ప్రకారం, క్రికెట్ సామాగ్రి లేదా మైదానంలోని దుస్తులు, సామగ్రిని అమర్యాదగా వాడినట్లయితే నిబంధనల ప్రకారం చర్యలు తీసుకుంటారు. ఇషాంత్ శర్మ తన తప్పును అంగీకరించాడు. మ్యాచ్ రిఫరీ జవగల్ శ్రీనాథ్ విధించిన జరిమానాను కూడా ఇషాంత్ స్వీకరించాడు. దీంతో అధికారి నిర్ణయానికి వ్యతిరేకంగా ఎటువంటి వినతిని నమోదు చేయలేదు.
హైదరాబాద్‌తో జరిగిన మ్యాచ్‌లో ఇషాంత్ శర్మ దారుణ ప్రదర్శన చూపాడు. నాలుగు ఓవర్లలో ఏకంగా 53 పరుగులు సమర్పించుకున్నాడు. గుజరాత్ టైటాన్స్ మ్యాచ్‌ను గెలుచుకున్నప్పటికీ, ఫీల్డింగ్ సమయంలో కూడా అతని ఆట తీరుపై విమర్శలు వచ్చాయి. షెర్ఫేన్ రూథర్‌ఫోర్డ్ను 13వ ఓవర్లో ఫీల్డింగ్‌కు పంపడం గమనార్హం.
ప్రస్తుతం వరుసగా మూడు మ్యాచుల్లో కూడా ఇషాంత్ శర్మకు నిరాశాజనక ఫలితాలే ఎదురవుతున్నాయి. ఇప్పటి వరకు 8 ఓవర్లలో 107 పరుగులు ఇచ్చిన అతను కేవలం ఒక్క వికెట్ మాత్రమే తీశాడు. ఇటువంటి ప్రదర్శన కారణంగా అతని స్థానంపై కూడా సందేహాలు తలెత్తుతున్నాయి. ప్రస్తుతం తాను ఫామ్‌లో లేని కారణంగా, బౌలింగ్‌తో పాటు మైదాన ప్రవర్తనపైనా నిబంధనలు పాటించాల్సిన అవసరం ఉందని అభిమానులు అభిప్రాయపడుతున్నారు.
