అమెరికా నౌకాదళానికి చెందిన యూఎస్‌ఎస్ హ్యారీ ఎస్ ట్రూమన్ విమానవాహక నౌకపై జరిగిన గందరగోళ ఘటనలో, విలువైన ఎఫ్/ఏ-18ఈ సూపర్ హార్నెట్ యుద్ధ విమానం ప్రమాదవశాత్తు సముద్రంలో పడిపోయింది. ఏప్రిల్ 28న ఎర్ర సముద్రంలో చోటుచేసుకున్న ఈ ఘటన యూఎస్ నేవీ అధికారికంగా ధృవీకరించింది. దాదాపు 476 కోట్ల విలువైన ఈ విమానం నౌక హ్యాంగర్ బేలో టోయింగ్ జరుగుతుండగా నియంత్రణ కోల్పోయింది.
యెమెన్ హౌతీ రెబల్స్ క్షిపణి, డ్రోన్ దాడుల నుండి తప్పించుకునేందుకు యూఎస్‌ఎస్ ట్రూమన్ నౌక అత్యవసరంగా మలుపు తీయాల్సి వచ్చింది. ఈ అకస్మాత్తు చర్య కారణంగా, టోయింగ్ సిబ్బంది విమానంపై నియంత్రణ కోల్పోయారు. దీంతో విమానం టో ట్రాక్టర్‌తో కలిసి ఎర్ర సముద్రంలోకి జారిపోయింది. విమానం పడే ముందు సిబ్బంది అప్రమత్తమై తప్పించుకోగా, ఒక నావికుడికి స్వల్ప గాయమైంది.
నౌకాదళం ప్రకారం, విమానం నష్టమైనా నౌక కార్యకలాపాలు యథావిధిగా కొనసాగుతున్నాయి. ప్రస్తుతానికి, విమానం పడిపోయిన ప్రదేశాన్ని గుర్తించి, దాన్ని వెలికితీయడం సాధ్యమేనా అనే దానిపై స్పష్టత రాలేదు. సముద్రంలో విమానాన్ని వెతికేందుకు నిపుణులతో కూడిన బృందాలు కృషి చేస్తున్నాయి. ప్రమాదంపై ఉన్నతస్థాయి దర్యాప్తు కొనసాగుతోంది.
గత డిసెంబర్‌లో కూడా ఇదే యూఎస్‌ఎస్ ట్రూమన్ స్ట్రైక్ గ్రూప్‌కు చెందిన మరో సూపర్ హార్నెట్ విమానం ఫ్రెండ్లీ ఫైర్ ఘటనలో ఎర్ర సముద్రంలో పడిపోయింది. తాజాగా చోటుచేసుకున్న ఈ ఘటనతో అమెరికా నౌకాదళం రెండు విలువైన యుద్ధ విమానాలను కోల్పోయింది. హౌతీ రెబల్స్ పై కొనసాగుతున్న ఆపరేషన్లలో ఇది అమెరికాకు తీవ్ర ప్రతిఘాతంగా మారింది.
