ప్రధాని నరేంద్ర మోదీ ఈ రోజు లోక్‌సభలో ప్రసంగిస్తూ, రాష్ట్రపతి ప్రసంగంపై ధన్యవాద తీర్మానం చేపట్టారు. దేశ ప్రజలు నాలుగోసారి తనకు ఆశీర్వదించారని, 21వ శతాబ్దంలో 25 శాతం కాలం ముగిసిన సందర్భంలో, వికసిత భారత్ లక్ష్యం మార్గంలో భారత్‌ను ముందుకు తీసుకెళ్లాలని ప్రకటించారు. ప్రజల ఆకాంక్షలను తీర్చటానికి తీసుకున్న పథకాల గురించి వివరించారు.
మోదీ తన ప్రసంగంలో 10 ఏళ్ల కాలంలో 25 కోట్ల మంది పేదరికాన్ని అధిగమించారని, పేదలు, మధ్యతరగతి ప్రజల ఆకాంక్షలను నెరవేర్చినట్లు తెలిపారు. ఐదేళ్లలో 12 కోట్ల మందికి తాగునీటి వసతి కల్పించామని, 4 కోట్ల పేదలకు గృహ వసతి అందించామని చెప్పారు. దేశంలో అన్ని వర్గాల సంక్షేమం కోసం చేపట్టిన పథకాలు విజయవంతమయ్యాయని అభిప్రాయపడ్డారు.
ప్రధాని రాహుల్ గాంధీపై సెటైర్లు వేసి, కొందరు నేతలు పేదలతో ఫొటో సెషన్‌లు చేస్తూ, పార్లమెంట్‌లో పేదలపై చర్చలో పాల్గొనరు అని వ్యాఖ్యానించారు. మేము బూటకపు హామీలు ఇవ్వలేదని, ప్రతి కార్యక్రమం ప్రజల ప్రయోజనాల కోసం మాత్రమే చేపడుతున్నామని స్పష్టం చేశారు. అలాగే, 12 కోట్ల మందికి మరుగుదొడ్లు, డిజిటల్ లావాదేవీలతో పారదర్శకత కల్పించడం, స్వచ్ఛ్ భారత్ లక్ష్యంతో ముందుకెళ్ళడం వారి ప్రధాన లక్ష్యమని చెప్పారు.
ప్రధాని మోదీ దేశంలో “చెత్త నుంచి సంపద” సృష్టిస్తున్నామన్న వ్యాఖ్యలు చేశారు. సమాజంలోని పేదవర్గాలను మానసికంగా, ఆర్థికంగా సాధికారికంగా తీర్చిదిద్దడమే తమ లక్ష్యం అని చెప్పారు.
