కర్నూలు జిల్లా మహిళా విభాగ అధ్యక్షురాలు శశికళ ఆదోని కేంద్రంగా మహిళా దినోత్సవాన్ని ఘనంగా నిర్వహించాలని పిలుపునిచ్చారు. బుధవారం వైసీపీ కార్యాలయంలో ఆమె మీడియాతో మాట్లాడారు. రాష్ట్ర మహిళా విభాగ అధ్యక్షురాలు వరద కళ్యాణి ఆదేశాల మేరకు ఈ కార్యక్రమాన్ని విజయవంతం చేయాలని ఆమె సూచించారు. మహిళలు సామాజిక, ఆర్థికంగా ఎదిగేందుకు జగనన్న ప్రభుత్వం ఎంతో కృషి చేసిందని ఆమె పేర్కొన్నారు.
కూటమి ప్రభుత్వం వచ్చాక మహిళలకు సంబంధించిన పథకాలను త్రుంగలో తొక్కారని శశికళ ఆరోపించారు. గత ప్రభుత్వ హయాంలో అమలు చేసిన ఆశా, అమ్మఒడి, వైఎస్సార్ చేయూత, సామాజిక భద్రత వంటి పథకాలు ఇప్పుడు ప్రహసనంగా మారాయని విమర్శించారు. జగనన్న హయాంలో మహిళలు అన్ని రంగాల్లో అభివృద్ధి సాధించారని, అదే ధ్యేయంతో ముందుకు సాగాలని పిలుపునిచ్చారు.
మార్చి 8న అంతర్జాతీయ మహిళా దినోత్సవాన్ని పురస్కరించుకుని ఆదోనిలో భారీ స్థాయిలో మహిళల సమావేశం నిర్వహించాలని ఆమె కోరారు. జిల్లావ్యాప్తంగా మహిళలు భారీ సంఖ్యలో హాజరై, తమ హక్కులను కోరాలని పిలుపునిచ్చారు. ఈ కార్యక్రమంలో మహిళా సంఘాల నాయకులు, వైసీపీ కార్యకర్తలు పెద్దఎత్తున పాల్గొనాలని విజ్ఞప్తి చేశారు.
మహిళల సంక్షేమం, అభివృద్ధికి వైసీపీ ప్రభుత్వం ఎల్లప్పుడూ కృషి చేస్తుందని, దీనికి ప్రజల మద్దతు అవసరమని ఆమె అన్నారు. మహిళా హక్కులను నిలబెట్టేందుకు, సంక్షేమ పథకాలను కొనసాగించేందుకు అంతా కలిసికట్టుగా ముందుకు రావాలని శశికళ కోరారు. మహిళా దినోత్సవం విజయవంతం చేసేందుకు ప్రతి ఒక్కరు తమ పాత్ర పోషించాలని ఆమె ఆకాంక్షించారు.
