అనకాపల్లి జిల్లా జవహర్లాల్ నెహ్రూ ఫార్మసిటీలో మరో ప్రమాదం చోటుచేసుకుంది. మెట్రోకమ్ పరిశ్రమలో భారీ అగ్ని ప్రమాదం సంభవించింది. స్టోరేజ్ ట్యాంకుల వద్ద మంటలు ఎగిసిపడటంతో కార్మికులు, స్థానిక ప్రజలు భయంతో పరుగులు తీశారు. వరుస ప్రమాదాలతో ఈ ప్రాంత ప్రజలు ఆందోళన వ్యక్తం చేస్తున్నారు.
మెట్రోకమ్ పరిశ్రమలో అగ్ని ప్రమాదం ఎలా జరిగిందనే విషయాన్ని అధికారులు పరిశీలిస్తున్నారు. స్టోరేజ్ ట్యాంకులు దగ్ధమవడంతో భారీగా పొగలు వ్యాపించాయి. అగ్నిమాపక సిబ్బంది ఘటన స్థలానికి చేరుకుని మంటలను అదుపు చేసే ప్రయత్నం చేస్తున్నారు.
ఇటీవల ఫార్మసిటీలో వరుసగా ప్రమాదాలు జరుగుతుండటంతో కార్మికులు ఆందోళన చెందుతున్నారు. తగిన భద్రతా చర్యలు తీసుకోవాలని డిమాండ్ చేస్తున్నారు. పరిశ్రమ యాజమాన్యం నిర్లక్ష్యంగా వ్యవహరిస్తోందని కార్మిక సంఘాలు ఆరోపిస్తున్నాయి.
ప్రమాదానికి గల కారణాలు వివరించేలా అధికారులు దర్యాప్తు చేపట్టారు. ఈ ప్రమాదంలో ఎవరికైనా గాయాలయ్యాయా అనే దానిపై ఇంకా స్పష్టత రాలేదు. పూర్తి వివరాలు తెలియాల్సి ఉంది.
