ఆంధ్రప్రదేశ్ ప్రజల కలల రాజధాని అమరావతి నిర్మాణం మరోసారి ప్రజల పాలిటి ఉద్యమంగా మారుతోంది. గతంలో ‘మై బ్రిక్ మై అమరావతి’ అనే వినూత్న కార్యక్రమం ద్వారా ప్రపంచవ్యాప్తంగా ప్రజల సహకారాన్ని అందుకున్న విధానాన్ని మళ్ళీ కొనసాగించాలని ఆంధ్రప్రదేశ్ ప్రభుత్వం నిర్ణయించింది.
ఈసారి, టెక్నాలజీ ఆధారంగా విరాళాలు సేకరించేందుకు ప్రత్యేకంగా “Donate for Amaravati” పేరుతో ఒక వ్యవస్థను ఏర్పాటు చేసింది. దీనిలో భాగంగా CRDA వెబ్‌సైట్‌ (crda.ap.gov.in) లోని ఆప్షన్‌ను ఉపయోగించి, ప్రజలు తమకు వీలైనంత విరాళాన్ని నగదు రూపంలో పంపించవచ్చు.
QR కోడ్ స్కాన్‌తో డొనేషన్ సులభం
వెబ్‌సైట్‌లో “Donate for Amaravati” ఆప్షన్‌ను క్లిక్ చేస్తే QR కోడ్ కనిపిస్తుంది. దీన్ని గూగుల్ పే, ఫోన్ పే, పేటీఎం వంటి UPI అప్లికేషన్లతో స్కాన్ చేసి డొనేట్ చేయొచ్చు. ఈ డబ్బులు నేరుగా ఏపీ సీఆర్డీఏ అధికారిక ఖాతాకు జమవుతాయి.
ఈ విధానం పారదర్శకంగా ఉండేలా రూపొందించబడింది. ప్రతి డొనేషన్‌కు సంబంధించి రసీదు జారీ అవుతుంది. అలాగే, అనేక మంది ఎన్‌ఆర్‌ఐలు, తెలుగు జాతీయత కలిగినవారు ఈ కొత్త వ్యవస్థ ద్వారా అమరావతి అభివృద్ధిలో భాగస్వాములు కావాలని ఆసక్తి చూపిస్తున్నారు.
మై బ్రిక్ మై అమరావతి – పూర్వ వైభవం
ఇది తొలిసారి కాదు. 2015లో అప్పటి ముఖ్యమంత్రి నారా చంద్రబాబు నాయుడు మొదలుపెట్టిన “మై బ్రిక్ మై అమరావతి” కార్యక్రమం దేశవ్యాప్తంగా మరియు ప్రపంచవ్యాప్తంగా స్పందన తెచ్చుకుంది. ఒక్కో ఇటుక ధరను రూ.10గా నిర్ణయించి, ప్రజలకు తన రాజధాని నిర్మాణంలో ఓ ఇటుక రూపంలో సహకరించే అవకాశం ఇచ్చారు.
ఈ కార్యక్రమానికి లక్షలాది ఇటుకలు విరాళంగా వచ్చాయి. NRIలు వేల ఇటుకలు డొనేట్ చేసి తమ మట్టితో తమ భవిష్యత్తు నిర్మాణానికి తోడ్పడాలని భావించారు. ప్రతి డొనేషన్‌కు CM సంతకం ఉన్న ధృవీకరణ రశీదు జారీ చేశారు. ఈ పద్ధతి ప్రజలకు ఎంతో గుర్తుగా మిగిలింది.
ప్రపంచ తెలుగు సమాజానికి పిలుపు
అమరావతి అభివృద్ధికి మళ్లీ ఒక సంధి సమయం వచ్చింది. తెలుగు ప్రజలంతా రాజకీయాలకు అతీతంగా ఈ రాజధాని అభివృద్ధిలో భాగస్వాములు కావాలని ప్రభుత్వం పిలుపునిస్తుంది. ఇది కేవలం నగదు సహాయం మాత్రమే కాదు, భవిష్యత్ తరాలకు బహుమానం కూడా.
