సింహాచలం శ్రీ వరాహ లక్ష్మీనరసింహ స్వామి వారి ఆలయంలో గోడ కూలిన ఘటన పట్ల రాష్ట్రవ్యాప్తంగా తీవ్ర విషాదం నెలకొంది. ఈ ఘటనలో ఏడుగురు భక్తులు ప్రాణాలు కోల్పోవడం అందరినీ కలచివేసింది. భక్తులు ఆలయ దర్శనానికి వచ్చిన సమయంలో ఈ ప్రమాదం చోటుచేసుకోవడంతో స్థానికులు, అధికారులు తీవ్ర ఆందోళన వ్యక్తం చేశారు.
ప్రమాదం జరిగిన ప్రాంతాన్ని వైసీపీ పార్టీకి చెందిన మాజీ మంత్రులు బొత్స సత్యనారాయణ, గుడివాడ అమర్ నాథ్ సహా పలువురు నేతలు సందర్శించారు. వారు అధికారులను కలిసి ప్రమాదానికి కారణాలపై వివరాలు అడిగి తెలుసుకున్నారు. భవిష్యత్‌లో ఇలాంటి ఘటనలు పునరావృతం కాకుండా జాగ్రత్తలు తీసుకోవాలని సూచించారు.
ఇక ప్రభుత్వం నియమించిన త్రిసభ్య కమిటీ కూడా ప్రమాద స్థలాన్ని పరిశీలించింది. కమిటీ సభ్యులు పరిస్థితిని సమీక్షించి, అధికారుల నుంచి అన్ని వివరాలను సేకరించారు. గోడ భద్రతా ప్రమాణాలు, నిర్వహణ లోపాలపై దృష్టి పెట్టి నివేదిక అందజేయనున్నారు.
ప్రభుత్వం ఈ ఘటనపై స్పందిస్తూ మృతుల కుటుంబాలకు ఒక్కొక్కరికి రూ. 25 లక్షల ఆర్ధిక సహాయాన్ని ప్రకటించింది. ప్రధాన మంత్రి సహాయ నిధి నుంచి కూడా ప్రతి కుటుంబానికి రూ. 2 లక్షలు ఇవ్వనున్నట్లు అధికారికంగా వెల్లడించారు. ప్రభుత్వం బాధిత కుటుంబాలకు అండగా ఉండాలని ప్రజలు కోరుతున్నారు.
