అమెరికా 47వ అధ్యక్షుడిగా డొనాల్డ్ ట్రంప్ బాధ్యతలు స్వీకరించనున్నారు. వైట్ హౌస్‌లో జరిగే కార్యక్రమంలో ప్రమాణ స్వీకారం చేసి, అధికారికంగా బైడెన్ నుంచి బాధ్యతలు తీసుకోనున్నారు. ఈ కార్యక్రమానికి ప్రముఖులు హాజరుకానుండగా, ప్రపంచమంతా ట్రంప్ నిర్ణయాలపై ఉత్కంఠగా ఉంది. గత పాలనతో పోల్చితే ఈసారి ఆయన మరింత దృఢంగా ముందుకు వెళ్లే అవకాశముంది.
అక్రమ వలసదారులపై ట్రంప్ తీసుకోబోయే చర్యలు తీవ్రమయ్యేలా కనిపిస్తున్నాయి. అక్రమంగా ఉన్నవారిని బలవంతంగా దేశం విడిచిపెట్టేలా చేస్తామని ఇప్పటికే ప్రకటించారు. వీసాల విషయంలోనూ అనేక మార్పులు తీసుకురాబోతున్నారు. హెచ్-1బీ వీసాలకు సంబంధించి కఠిన నిబంధనలు అమలు చేసేలా ప్రణాళికలు రూపొందిస్తున్నారు. అమెరికాలో చదువుకుని స్థిరపడాలనుకునే విదేశీయులకు ఇది పెద్ద షాక్‌గా మారనుంది.
ట్రంప్ పాలన ప్రారంభానికి ముందే పొరుగుదేశాలతో ఆయన వైఖరి వివాదాస్పదంగా మారింది. కొన్ని దేశాలను తమ పరిధిలోకి తీసుకుంటామనే వ్యాఖ్యలు చేశారు. మిత్రదేశాలతో సంబంధాలు ఎలా ఉండబోతాయనే దానిపై అనేక అనుమానాలు వ్యక్తమవుతున్నాయి. అమెరికా ప్రజల భద్రత కోసం ఆయన తీసుకునే చర్యలు ఇతర దేశాలకు సవాల్‌గా మారతాయా? అన్న ప్రశ్నలు కూడా తలెత్తుతున్నాయి.
యుద్ధాలకు వ్యతిరేకమని ట్రంప్ ప్రకటించినా, ఆయన వ్యక్తిత్వం కారణంగా అనేక దేశాలు ఆందోళన చెందుతున్నాయి. ఆయన నిర్ణయాలు ప్రపంచంపై ఎలా ప్రభావం చూపుతాయనే ఉత్కంఠ నెలకొంది. టెన్షన్ మధ్య ట్రంప్ ప్రమాణ స్వీకారం చేయనుండగా, ఆయన మొదటి రోజుల్లోనే తీసుకునే నిర్ణయాలు అంతర్జాతీయంగా పెను మార్పులకు దారితీయవచ్చని విశ్లేషకులు భావిస్తున్నారు.
