ముంబైకి చెందిన 16 ఏళ్ల బాలిక కామ్యా కార్తికేయన్‌ పర్వతారోహణలో ప్రపంచ రికార్డు సాధించింది. ఏడు ఖండాలలోని అత్యంత ఎత్తైన పర్వతాలను అధిరోహించిన అతి పిన్న వయస్కులుగా రికార్డు సృష్టించిన కామ్యా, సప్త పర్వతాధిరోహణ సవాల్‌ను విజయవంతంగా పూర్తి చేసింది.
ఈ సవాల్‌లో భాగంగా కామ్యా, ఆఫ్రికాలోని మౌంట్‌ కిలిమంజారో, యూరప్‌లోని మౌంట్‌ ఎల్‌బ్రస్, ఆస్ట్రేలియాలోని మౌంట్‌ కాజీయాస్కో, దక్షిణ అమెరికాలోని మౌంట్‌ అకాన్‌కాగువా, ఉత్తర అమెరికాలోని మౌంట్‌ డెనాలి, ఆసియాలోని మౌంట్‌ ఎవరెస్ట్‌, ఆంటార్క్టికాలోని మౌంట్‌ విన్సన్‌ను విజయవంతంగా అధిరోహించింది.
తన తండ్రి కమాండర్‌ కార్తికేయన్‌తో కలిసి మౌంట్‌ విన్సన్‌ను చేరుకున్న కామ్యా, డిసెంబర్‌ 24న ఈ సవాల్‌ను పూర్తిచేసింది. ప్రస్తుతం ముంబైలోని నేవీ చిల్డ్రన్‌ స్కూల్‌లో 12వ తరగతి చదువుతున్న కామ్యా, తన ఈ ఘనతతో దేశం ప్రతిష్టను పెంచింది.
భారతీయ నేవీ కమాండర్‌ కార్తికేయన్‌ తన కుమార్తెను అభినందించారు. తన తదుపరి లక్ష్యంగా ఉత్తర ధ్రువం మరియు దక్షిణ ధ్రువం చేరుకోవాలని కామ్యా నిర్దేశించింది.
