మెదక్ జిల్లా కొల్చారం మండలం పోతన శెట్టిపల్లి టి జంక్షన్ జాతీయ రహదారిపై భద్రతను పెంచేందుకు 16 సీసీ కెమెరాలను ఏర్పాటు చేశారు. మంగళవారం జిల్లా ఎస్పీ ఉదయ్ కుమార్ రెడ్డి వీటిని ప్రారంభించారు. ఈ కార్యక్రమానికి పలువురు పోలీస్ అధికారులు, ప్రజా ప్రతినిధులు హాజరయ్యారు. నేరాల అదుపు కోసం సీసీ కెమెరాలు ఎంతో కీలకమని ఎస్పీ అన్నారు.
సీసీ కెమెరాలు చోరీలు, నేరాలు జరిగినప్పుడు నేరస్తులను గుర్తించేందుకు ఉపయోగపడతాయని ఎస్పీ ఉదయ్ కుమార్ రెడ్డి వివరించారు. నేరస్థులు ట్రాక్ అవ్వడం సులభమవుతుందని, ప్రజలు కూడా భద్రత చర్యలకు సహకరించాలని కోరారు. గ్రామాల్లోనూ సీసీ కెమెరాల ఏర్పాటు గురించి ప్రజలకు అవగాహన కల్పించాలని సూచించారు.
జాతీయ రహదారిపై రోడ్డు ప్రమాదాలను నివారించేందుకు సీసీ కెమెరాలు ముఖ్యమైన వంతు పోషిస్తాయని చెప్పారు. అతివేగంగా ప్రయాణించే వాహనాలను గుర్తించి ఫైన్ విధించేందుకు వీటిని ఉపయోగిస్తామని తెలిపారు. ప్రజలు ట్రాఫిక్ నిబంధనలను కచ్చితంగా పాటించాలని, ఆటో డ్రైవర్లు మద్యం సేవించి వాహనాలు నడపకూడదని హెచ్చరించారు.
ఈ కార్యక్రమంలో డి.ఎస్.పి ప్రసన్న కుమార్, మెదక్ రూరల్ సీఐ రాజశేఖర్ రెడ్డి, కొల్చారం ఎస్సై మహమ్మద్ గౌస్, పాపన్నపేట ఎస్సై శ్రీనివాస గౌడ్ తదితరులు పాల్గొన్నారు. భద్రత కోసం సీసీ కెమెరాల ఏర్పాటుకు దాతలు సహాయపడటాన్ని ఎస్పీ ప్రశంసించారు.
