Most Polluted Cities in India: పండుగల సందడి ముగిసింది.. కానీ దేశవ్యాప్తంగా కాలుష్య మేఘాలు కమ్ముకున్నాయి. స్వచ్ఛమైన గాలి కోసం ఎదురుచూస్తున్న ప్రజలకు తాజా అంతర్జాతీయ నివేదిక ఆందోళన కలిగిస్తోంది. ప్రపంచంలోనే అత్యంత కాలుష్య నగరాల జాబితాలో భారత నగరాలు భారీ సంఖ్యలో చోటు దక్కించుకున్నాయి. టాప్ 100లో ఏకంగా 93 నగరాలు మన దేశానికి చెందినవే కావడం పరిస్థితి తీవ్రతకు అద్దం పడుతోంది. నవంబర్ 8న దీపావళి వేడుకలు ముగిసిన మరుసటి రోజు.. నవంబర్ 9 ఉదయం 10:05 గంటలకు AQI.in వెల్లడించిన గణాంకాలు ఈ విషయాన్ని స్పష్టం చేశాయి. రాజస్థాన్‌లోని శ్రీగంగానగర్ 868 AQIతో ప్రపంచంలోనే అత్యంత కాలుష్య నగరంగా మొదటి స్థానంలో నిలిచింది. పంజాబ్‌లోని ఫరీద్‌కోట్ 842 AQIతో రెండో స్థానంలో, భటిండా 797 AQIతో మూడో స్థానంలో ఉన్నాయి.
టాప్ 10లోనూ భారత నగరాలదే ఆధిపత్యం. హరియాణాలోని సిర్సా 612, భివానీ 548 AQIతో నాలుగు, ఐదు స్థానాల్లో నిలిచాయి. ఉత్తరప్రదేశ్‌లోని బుదౌన్ 489, హిసార్ 485, అమృత్‌సర్ 451 AQIతో తర్వాతి స్థానాల్లో ఉన్నాయి. పాకిస్థాన్‌లోని లాహోర్ 446 AQIతో తొమ్మిదో స్థానంలో ఉండగా.. ప్రయాగ్‌రాజ్ 440 AQIతో పదో స్థానాన్ని దక్కించుకుంది. దేశ రాజధాని ఢిల్లీలో 380 AQI నమోదై అంతర్జాతీయంగా 15వ స్థానంలో నిలిచింది. లక్నోలో 344, కాన్పూర్‌లో 337, ఘాజియాబాద్‌లో 331, గ్రేటర్ నోయిడాలో 327, నోయిడాలో 307 AQI నమోదైంది.
ఉత్తర భారతదేశానికే పరిమితం కాకుండా ఇతర ప్రాంతాల్లోనూ కాలుష్యం ప్రభావం కనిపించింది. పుణెలో 278, భోపాల్‌లో 284, పట్నాలో 258, వారణాసిలో 243, రాజ్‌కోట్‌లో 242 AQI నమోదైంది. భువనేశ్వర్‌లో 200, దుర్గాపూర్‌లో 197, హౌరాలో 187, కోల్‌కతాలో 183 AQI రికార్డయ్యాయి. భారత్ వెలుపల పాకిస్థాన్, బ్రిటన్, పోలాండ్, ఇండోనేషియాకు చెందిన ఏడు నగరాలు మాత్రమే టాప్ 100లో చోటు సంపాదించాయి. మొత్తంగా.. దీపావళి తర్వాత కాలుష్యం పెరిగినప్పటికీ, ఈ పరిస్థితికి పండుగ వేడుకలే ఏకైక కారణమని చెప్పలేం. వాహనాల పొగ, పారిశ్రామిక ఉద్గారాలు, నిర్మాణ పనుల ధూళి, వాతావరణ పరిస్థితులు కూడా కాలుష్యానికి కారణమవుతాయి. గాలి నాణ్యతను మెరుగుపరిచేందుకు ప్రభుత్వాలు, ప్రజలు సమష్టిగా చర్యలు తీసుకోవాల్సిన అవసరాన్ని ఈ గణాంకాలు గుర్తుచేస్తున్నాయి.
