Census 2027 Telangana: దేశ జనాభా వివరాలను సరికొత్త సాంకేతికతతో నమోదు చేసేందుకు కేంద్ర ప్రభుత్వం చేపట్టిన జనగణన 2027 ప్రక్రియలో తెలంగాణ మరో కీలక అడుగు వేసింది. రాష్ట్రంలో రెండో విడత జనాభా లెక్కింపునకు సంబంధించి ప్రభుత్వం అధికారిక ఉత్తర్వులు జారీ చేసింది. ఈ మేరకు సాధారణ పరిపాలన శాఖ జీఓ నంబర్ 155ను విడుదల చేసింది. కేంద్ర హోంశాఖ పరిధిలోని రిజిస్ట్రార్ జనరల్ అండ్ సెన్సస్ కమిషనర్ కార్యాలయం అక్టోబర్ 30న జారీ చేసిన గెజిట్ నోటిఫికేషన్ ఆధారంగా రాష్ట్ర ప్రభుత్వం ఈ ఉత్తర్వులను జారీ చేసింది. కేంద్ర నోటిఫికేషన్‌ను తెలంగాణ రాష్ట్ర గెజెట్‌లోనూ పునఃప్రచురించింది.
ఈ ఉత్తర్వుల్లో జనగణన రెండో దశకు సంబంధించిన మూడు ముఖ్యమైన ప్రక్రియలను ప్రభుత్వం స్పష్టం చేసింది. ఇందులో జనాభా గణన (Population Enumeration), పౌరులు తమ వివరాలను తామే నమోదు చేసుకునే స్వయం గణన (Self-Enumeration), అలాగే సవరణ విడత (Revisional Round) ఉన్నాయి. ఈ మూడు ప్రక్రియలకు సంబంధించిన తేదీలను అధికారికంగా నోటిఫై చేసింది. ముఖ్యంగా స్వయం గణన విధానం ద్వారా ప్రజలు తమ వ్యక్తిగత వివరాలను స్వయంగా నమోదు చేసుకునే అవకాశం ఉంటుంది. క్షేత్రస్థాయి సర్వే పూర్తయిన తర్వాత కూడా ఎవరైనా లెక్కింపులో మిగిలిపోయినా, వివరాల్లో మార్పులు చోటుచేసుకున్నా వాటిని సరిచేసుకునేందుకు సవరణ విడత ఉపయోగపడుతుంది.
ఈసారి జనాభా లెక్కింపును మరింత పారదర్శకంగా, కచ్చితత్వంతో, డిజిటల్ విధానంలో నిర్వహించేందుకు ప్రభుత్వం ప్రత్యేక దృష్టి పెట్టింది. ఇందులో భాగంగా ముందస్తు ఏర్పాట్లు వేగవంతం చేయాలని అధికారులకు ఆదేశాలు జారీ చేసింది. జనగణన ప్రక్రియ సజావుగా సాగేందుకు జీహెచ్‌ఎంసీ కమిషనర్, జిల్లా కలెక్టర్లు, ఇతర సంబంధిత శాఖల అధికారులు అవసరమైన చర్యలు చేపట్టాలని ప్రభుత్వం స్పష్టం చేసింది. క్షేత్రస్థాయి పరిశీలనకు అవసరమైన సిబ్బంది, సమన్వయం, ఇతర ఏర్పాట్లపై ముందుగానే దృష్టి సారించాలని సూచించింది. మొత్తంగా చూస్తే.. జనగణన 2027ను విజయవంతంగా నిర్వహించేందుకు తెలంగాణ ప్రభుత్వం కార్యాచరణను వేగవంతం చేసింది. ప్రజల భాగస్వామ్యంతో కచ్చితమైన జనాభా వివరాల సేకరణకు ఈ డిజిటల్ ప్రక్రియ ఎంతగానో దోహదపడనుంది.
