RGV Ramayana Comments: సినిమా బాగుంటే ప్రశంసించడం.. నచ్చకపోతే నిర్మొహమాటంగా విమర్శించడం దర్శకుడు రామ్ గోపాల్ వర్మ ప్రత్యేకత. తాజాగా ఆయన దృష్టిని ఆకర్షించిన చిత్రం ‘రామాయణ: పార్ట్ 1’. ఈ సినిమాపై తనదైన శైలిలో స్పందించిన ఆర్జీవీ.. చిత్రబృందంపై ప్రశంసలు కురిపించారు. అంతేకాదు, ఈ సినిమాను కేవలం భక్తిరస చిత్రంగా చూడకూడదని, అదొక ‘భక్తి శక్తి’ అని అభివర్ణించారు. సోషల్ మీడియా వేదికగా తన అభిప్రాయాలను పంచుకున్న వర్మ.. సినిమా కోసం చిత్రబృందం చేసిన కృషితో పోలిస్తే బయట వినిపిస్తున్న విమర్శలు చాలా చిన్నవని పేర్కొన్నారు. విమర్శలను పట్టించుకోకుండా తమ ప్రయత్నాన్ని కొనసాగించాలని సూచించారు. ముఖ్యంగా రాముడి పాత్రను తెరపై ఆవిష్కరించిన తీరు తనను ఆకట్టుకుందని తెలిపారు.
ఈ సినిమాలో రాముడిని ఎలాంటి భావోద్వేగాలు లేని దైవిక రూపంలో కాకుండా.. ఎదురయ్యే కష్టాలను, ప్రమాదాలను తెలిసినా ధైర్యంగా ముందుకు సాగే వ్యక్తిగా చూపించారని విశ్లేషించారు. సినిమాలోని హింస కూడా కథలోని పరిణామాలకు అనుగుణంగా ఉందని అభిప్రాయపడ్డారు. ఇక రాముడి పాత్రలో రణ్‌బీర్ కపూర్, రావణుడిగా యశ్ నటనను ప్రత్యేకంగా ప్రశంసించారు. ముఖ్యంగా సీత అపహరణ తర్వాత ఖాళీగా ఉన్న ఆశ్రమంలో రాముడు కనిపించే సన్నివేశాన్ని ప్రస్తావించారు. ఆ సన్నివేశంలో రణ్‌బీర్ తన హావభావాలతో పలికించిన బాధను కెమెరా అద్భుతంగా చిత్రీకరించిందని కొనియాడారు.
నమిత్ మల్హోత్రా నిర్మాణంలో, నితేశ్ తివారీ దర్శకత్వంలో తెరకెక్కిన ఈ చిత్రంలో రణ్‌బీర్ కపూర్, సాయి పల్లవి, యశ్ కీలక పాత్రలు పోషించారు. నవంబర్ 5న విడుదలైన ఈ సినిమా బాక్సాఫీస్ వద్ద మంచి వసూళ్లు సాధిస్తున్నట్లు కథనాలు వెలువడుతున్నాయి. మొత్తానికి, ‘రామాయణ’పై ఆర్జీవీ చేసిన వ్యాఖ్యలు ఇప్పుడు సినీ వర్గాల్లో చర్చనీయాంశంగా మారాయి. ముఖ్యంగా రణ్‌బీర్, యశ్ నటనపై ఆయన వ్యక్తం చేసిన ప్రశంసలు అభిమానుల్లో ఆసక్తిని మరింత పెంచుతున్నాయి.
ALSO READ: Most Polluted Cities in India | కాలుష్యంలో భారత్ టాప్.. ప్రపంచ జాబితాలో మన నగరాలదే ఆధిపత్యం!
