Sarvam AI: భారత్‌ను ప్రపంచ ఏఐ (ఆర్టిఫిషియల్ ఇంటెలిజెన్స్) రంగంలో అగ్రగామిగా నిలబెట్టాలనే లక్ష్యంతో దేశీయ టెక్ సంస్థలు తమ వ్యూహాలకు పదును పెడుతున్నాయి. ఈ క్రమంలో భారతీయ ఏఐ స్టార్టప్ సర్వమ్ ఏఐ కీలక నియామకంతో వార్తల్లో నిలిచింది. గూగుల్ క్లౌడ్ ఇండియా మాజీ మేనేజింగ్ డైరెక్టర్ శశికుమార్ శ్రీధరన్‌ను సంస్థ ప్రెసిడెంట్‌, చీఫ్ బిజినెస్ ఆఫీసర్‌ (CBO)గా నియమించింది. టెక్నాలజీ పరిశ్రమలో మూడు దశాబ్దాలకు పైగా అనుభవం ఉన్న శశికుమార్ రాకతో సర్వమ్ ఏఐ వ్యాపార విస్తరణకు కొత్త ఊపు రానుంది. ఆయన సంస్థ బోర్డ్ ఆఫ్ డైరెక్టర్స్‌లోనూ సభ్యుడిగా బాధ్యతలు చేపట్టనున్నారు. గతంలో గూగుల్ క్లౌడ్ ఇండియాలో కీలకంగా పనిచేసిన ఆయన.. అంతకుముందు మైక్రోసాఫ్ట్ ఇండియా ఎంటర్‌ప్రైజ్ బిజినెస్‌కు ఐదేళ్లకు పైగా నాయకత్వం వహించారు.
సర్వమ్ ఏఐలో మార్కెటింగ్, ఫైనాన్స్, ఫార్వర్డ్ డిప్లాయ్డ్ ఇంజినీరింగ్, సర్వీస్ డెలివరీ, కమర్షియల్ ఆపరేషన్స్ వంటి విభాగాలను ఆయన పర్యవేక్షించనున్నారు. ముఖ్యంగా సంస్థ ఏఐ సేవలను మరిన్ని ప్రైవేట్ కంపెనీలు, ప్రభుత్వ శాఖలకు విస్తరించడం ఆయన ప్రధాన బాధ్యత కానుంది. ప్రస్తుతం 100కు పైగా కార్పొరేట్ సంస్థలు, ప్రభుత్వ విభాగాలు సర్వమ్ ఏఐ సేవలను ఉపయోగిస్తున్నాయని కంపెనీ వెల్లడించింది. ఈ సంఖ్యను మరింత పెంచడంతో పాటు పరిశోధన, సాంకేతిక అభివృద్ధి, అంతర్జాతీయ మార్కెట్లకు అనువైన ఏఐ ఉత్పత్తుల రూపకల్పనపై దృష్టి సారిస్తోంది. సంస్థల డేటా, ఏఐ మోడళ్లు, ఏజెంట్లపై ఆయా సంస్థలకే పూర్తి నియంత్రణ ఉండేలా పరిష్కారాలను అందించడానికీ ప్రాధాన్యత ఇస్తోంది.
ఈ కొత్త బాధ్యతలపై శశికుమార్ శ్రీధరన్ స్పందిస్తూ.. ప్రపంచం వినియోగించే ఏఐ టెక్నాలజీని భారత్ నుంచే అభివృద్ధి చేసే స్థాయికి దేశం ఎదగాలని ఆకాంక్షించారు. పరిశ్రమలు, ప్రభుత్వాల రోజువారీ కార్యకలాపాలకు ఉపయోగపడే వినూత్న ఉత్పత్తుల రూపకల్పనలో భాగస్వామి కావడం సంతోషంగా ఉందన్నారు. మొత్తంగా చూస్తే.. అనుభవజ్ఞుడైన టెక్నాలజీ నాయకుడి నియామకంతో సర్వమ్ ఏఐ తన వ్యాపార విస్తరణకు మరింత బలాన్ని సమకూర్చుకుంది. అంతర్జాతీయ ఏఐ మార్కెట్‌లో భారతీయ సంస్థల ప్రాధాన్యతను పెంచే ప్రయత్నాల్లో ఈ నియామకం కీలక మలుపుగా మారనుంది.
ALSO READ: CM Chandrababu Naidu | అవినీతికి చెక్ పెట్టాలంటే డిజిటల్ కరెన్సీనే మార్గం.. చంద్రబాబు కీలక వ్యాఖ్యలు
