Telangana High Court: హైడ్రా(HYDRAA) కమిషనర్ రంగనాథ్కు తెలంగాణ హైకోర్టు భారీ షాక్ ఇచ్చింది. కోర్టు ఆదేశాలను లెక్కచేయకుండా వ్యవహరించినందుకు న్యాయస్థానం ఆగ్రహం వ్యక్తం చేస్తూ రూ.50,000 జరిమానా విధించింది. ఈ తీర్పు రాష్ట్రవ్యాప్తంగా అధికార వర్గాల్లో చర్చనీయాంశంగా మారింది.
వివరాల్లోకి వెళ్తే, నగరంలోని చెరువుల పరిరక్షణ, అక్రమ నిర్మాణాల కూల్చివేతల విషయంలో హైడ్రా చేపడుతున్న చర్యలు ఇప్పటికే పెద్ద ఎత్తున వార్తల్లో నిలుస్తున్నాయి. ఈ నేపథ్యంలో ఒక కేసు విచారణకు సంబంధించి హైకోర్టు స్పష్టమైన ఆదేశాలు జారీ చేసినప్పటికీ, కమిషనర్ తరఫున సకాలంలో కౌంటర్ అఫిడవిట్ దాఖలు చేయకపోవడం వల్ల కేసు విచారణలో ఆలస్యం చోటుచేసుకుంది. ఈ నిర్లక్ష్యాన్ని తీవ్రంగా పరిగణించిన హైకోర్టు, బాధ్యతాయుతమైన పదవిలో ఉన్న అధికారి ఇలా వ్యవహరించడం సరైనది కాదని ఘాటుగా వ్యాఖ్యానించింది. కోర్టు ఆదేశాలను పదేపదే ఆలస్యం చేయడం, గడువు కోరుతూ కాలయాపన చేయడం న్యాయ వ్యవస్థను అవమానపరచినట్లేనని న్యాయమూర్తి అభిప్రాయపడ్డారు.
ఈ నేపథ్యంలో కమిషనర్ రంగనాథ్పై రూ.50,000 కాస్ట్ విధిస్తూ, ఆ మొత్తాన్ని తక్షణమే హైకోర్టు ప్రధాన న్యాయమూర్తి రిలీఫ్ ఫండ్కు జమ చేయాలని స్పష్టమైన ఆదేశాలు జారీ చేసింది. ప్రభుత్వ ఉన్నతాధికారిపై కోర్టు తీసుకున్న ఈ కఠిన చర్య ఇప్పుడు ఐఏఎస్, ఐపీఎస్ వర్గాల్లోనే కాకుండా రాజకీయ వర్గాల్లోనూ తీవ్ర చర్చకు దారితీసింది. ప్రభుత్వ విభాగాల పనితీరు, కోర్టు ఆదేశాల అమలు అంశంపై ఈ తీర్పు మరోసారి దృష్టిని ఆకర్షించింది.
ALSO READ: Telangana School Uniform | ప్రభుత్వ పాఠశాల విద్యార్థులకు కొత్త యూనిఫాం.. ప్రభుత్వం కీలక నిర్ణయం
