Telangana School Uniform | ప్రభుత్వ పాఠశాల విద్యార్థులకు కొత్త యూనిఫాం.. ప్రభుత్వం కీలక నిర్ణయం

Telangana School Uniform: తెలంగాణ ప్రభుత్వం ప్రభుత్వ పాఠశాలల విద్యార్థుల యూనిఫాంల విషయంలో కీలక మార్పులు ప్రకటించింది. 2026-27 విద్యా సంవత్సరం నుంచి కొత్త డ్రెస్ కోడ్‌ను అమలు చేయనున్నట్లు విద్యాశాఖ అధికారులు వెల్లడించారు. విద్యార్థులకు మరింత ఆకర్షణీయంగా, సౌకర్యవంతంగా ఉండే విధంగా యూనిఫాం డిజైన్‌లో పలు మార్పులు చేసినట్లు ప్రభుత్వం తెలిపింది.

వేసవి సెలవుల అనంతరం ఈ నెల 15వ తేదీ నుంచి పాఠశాలలు తిరిగి ప్రారంభం కానుండగా, ప్రారంభమైన కొద్ది రోజుల్లోనే కొత్త యూనిఫాంలు విద్యార్థులకు అందేలా చర్యలు తీసుకుంటున్నారు. గత ఏడాది అందించిన యూనిఫాంలపై వచ్చిన అభిప్రాయాలు, ఫిర్యాదులను పరిగణలోకి తీసుకుని ఈసారి డిజైన్‌ను పూర్తిగా మార్చినట్లు సమాచారం. కొత్త డిజైన్ ప్రకారం బాలురకు లైట్ బ్లూ రంగు షర్టులు, డార్క్ బ్లూ రంగు ప్యాంట్లు అందించనున్నారు.

అదే విధంగా బాలికలకు లైట్ బ్లూ టాప్స్‌తో పాటు డార్క్ బ్లూ చుడీదార్లు మరియు స్కర్ట్లు ఉండనున్నాయి. యూనిఫాం రూపకల్పనలో రంగుల సమతౌల్యం మరియు ఆకర్షణీయతకు ప్రాధాన్యం ఇచ్చారు. ఇంకా ప్రత్యేకతగా బాలుర షర్టుల ముందు జేబు మరియు చేతులపై డార్క్ బ్లూ పట్టీలు ఏర్పాటు చేయనున్నారు. బాలికల పంజాబీ డ్రెస్సుల్లో కూడా చేతుల భాగం మరియు వెయిస్ట్ కోట్ ప్రాంతంలో అదే రంగు పట్టీలు ఉండేలా డిజైన్ చేశారు.

విద్యార్థులకు మెరుగైన రూపంలో, ఆధునిక శైలిలో యూనిఫాంలను అందించడమే ప్రభుత్వ ప్రధాన లక్ష్యమని అధికారులు తెలిపారు. అదేవిధంగా ఆరో, ఏడో తరగతి చదివే బాలురకు ప్యాంట్లు తప్పనిసరి చేస్తూ విద్యాశాఖ స్పష్టమైన మార్గదర్శకాలు జారీ చేసింది.