Suryakumar Yadav Political News: క్రికెట్ మైదానంలో తనదైన బ్యాటింగ్‌తో అభిమానులను అలరిస్తున్న టీమిండియా టీ20 కెప్టెన్ సూర్యకుమార్ యాదవ్.. ఇప్పుడు రాజకీయ వర్గాల్లోనూ హాట్ టాపిక్‌గా మారారు. ప్రధానమంత్రి నరేంద్ర మోడీ, కేంద్ర హోంమంత్రి అమిత్ షాలతో ఆయన భేటీ కావడంతో కొత్త ఊహాగానాలు తెరపైకి వచ్చాయి. ఈ మర్యాదపూర్వక సమావేశాల నేపథ్యంలో సూర్యకుమార్ యాదవ్ త్వరలో బీజేపీలో చేరబోతున్నారంటూ సోషల్ మీడియాలో ప్రచారం ఊపందుకుంది. ముఖ్యంగా ఉత్తరప్రదేశ్ రాజకీయాలతో ఈ వార్తలకు ముడిపెడుతున్నారు. ఘాజీపూర్ జిల్లా సూర్యకుమార్ స్వస్థలం కావడం, యాదవ సామాజికవర్గానికి అక్కడ గణనీయమైన రాజకీయ ప్రాధాన్యత ఉండటంతో బీజేపీ ఆయనకు రాజకీయంగా కీలక బాధ్యతలు అప్పగించే అవకాశం ఉందనే చర్చ సాగుతోంది.
ఉత్తరప్రదేశ్‌లో సమాజ్‌వాదీ పార్టీకి యాదవ సామాజికవర్గం సంప్రదాయ మద్దతు ఉండటంతో, ఆ ఓటు బ్యాంకుపై ప్రభావం చూపేందుకు సూర్యకుమార్ వంటి ప్రజాదరణ కలిగిన వ్యక్తిని ఉపయోగించుకోవాలనే వ్యూహంలో బీజేపీ ఉందని కొన్ని కథనాలు పేర్కొంటున్నాయి. రాబోయే అసెంబ్లీ ఎన్నికల నేపథ్యంలో ఈ ప్రచారం మరింత ఆసక్తిని రేకెత్తిస్తోంది. అయితే, ఈ భేటీలను రాజకీయ కోణంలో చూడాల్సిన అవసరం లేదని, క్రీడలు, దేశాభివృద్ధికి సంబంధించిన అంశాలపైనే చర్చ జరిగి ఉండవచ్చని విశ్లేషకులు అభిప్రాయపడుతున్నారు. అంతేకాదు, సూర్యకుమార్ రాజకీయ ప్రవేశంపై ఇప్పటివరకు ఆయన నుంచి గానీ, బీజేపీ నాయకత్వం నుంచి గానీ ఎలాంటి అధికారిక ప్రకటన వెలువడలేదు. మొత్తానికి, మోడీ, అమిత్ షాలతో సూర్యకుమార్ భేటీ రాజకీయ ప్రవేశంపై ఊహాగానాలకు తెరతీసినా.. ఆయన భవిష్యత్తు అడుగులు ఎటువైపు పడతాయన్నది అధికారిక ప్రకటన వచ్చే వరకు వేచి చూడాల్సిందే.
ALSO READ: Sonia Gandhi Biopic | సోనియా గాంధీ జీవిత కథ సినిమాగా తీస్తా: జగ్గారెడ్డి
