Sabarimala Accommodation: శబరిమలలో రూమ్ దొరుకుతుందో లేదోనని ఆందోళన చెందుతున్నారా? దర్శనం కోసం వెళ్లి వసతి కోసం ఇబ్బందులు పడకూడదనుకుంటున్నారా? అయితే అయ్యప్ప భక్తులకు ట్రావెన్‌కోర్ దేవస్వం బోర్డు కీలకమైన సమాచారం అందించింది. శబరిమల సన్నిధానంలో బస చేయాలనుకునే భక్తుల కోసం ఆన్‌లైన్ గదుల బుకింగ్ సదుపాయాన్ని అందుబాటులోకి తీసుకొస్తోంది. మరి ఈ బుకింగ్స్ ఎప్పటి నుంచి ప్రారంభమవుతాయి? ఎలా రిజర్వ్ చేసుకోవాలి? తెలుసుకుందాం. కార్తీక మాసం ప్రారంభం కావడంతో అయ్యప్ప స్వామి భక్తులు మాలధారణ చేసి మండల దీక్షకు సిద్ధమవుతున్నారు. నిష్ఠతో దీక్షను కొనసాగిస్తూ ఇరుముడితో శబరిమల యాత్రకు బయలుదేరుతున్నారు. ఈ క్రమంలో ఏటా లక్షలాది మంది భక్తులతో శబరిగిరులు కిటకిటలాడుతుంటాయి. ముఖ్యంగా సన్నిధానంలో బస చేయాలనుకునే వారికి గదుల లభ్యత పెద్ద సమస్యగా మారుతోంది. ఈ ఇబ్బందులను తగ్గించేందుకు దేవస్వం బోర్డు ముందస్తు ఆన్‌లైన్ రిజర్వేషన్ సదుపాయాన్ని కల్పిస్తోంది.
నవంబర్ 11న సాయంత్రం 5 గంటల నుంచి రూమ్ బుకింగ్స్ ప్రారంభం కానున్నాయి. భక్తులు www.onlinetdb.com అధికారిక వెబ్‌సైట్ ద్వారా గదులను రిజర్వ్ చేసుకోవచ్చు. మొదటి విడతలో రాబోయే 15 రోజుల కాలానికి మాత్రమే బుకింగ్ చేసుకునే అవకాశం ఉంటుంది. ఆ తర్వాత ప్రతిరోజూ తదుపరి రోజుకు సంబంధించిన రిజర్వేషన్లు అందుబాటులోకి వస్తాయి. అంటే, ఏ తేదీకి గది కావాలో ఆ తేదీకి సరిగ్గా 15 రోజుల ముందుగా అర్ధరాత్రి 12 గంటలకు బుకింగ్ విండో తెరుచుకుంటుంది. దీంతో భక్తులు తమ యాత్ర తేదీలను ముందుగానే ఖరారు చేసుకుని గదులను బుక్ చేసుకోవచ్చు. సన్నిధానానికి చేరుకున్న తర్వాత వసతి కోసం వెతుక్కునే సమయం, శ్రమ కూడా తగ్గుతుంది. అయితే గదుల లభ్యతను బట్టి కేటాయింపులు ఉంటాయి కాబట్టి వీలైనంత త్వరగా రిజర్వేషన్ చేసుకోవడం మంచిది.
ఇక ఈ ఏడాది మండల పూజల కోసం నవంబర్ 16వ తేదీ సాయంత్రం 5 గంటలకు శబరిమల ఆలయ ద్వారాలు తెరుచుకోనున్నాయి. ఆలయం తెరిచిన అనంతరం భక్తులకు స్వామివారి దర్శనానికి అనుమతిస్తారు. మండల పూజా కాలం 41 రోజుల పాటు కొనసాగనుంది. ఈ సమయంలో ప్రత్యేక పూజలు, అభిషేకాలు, హారతులతో అయ్యప్ప సన్నిధానం ఆధ్యాత్మిక శోభను సంతరించుకోనుంది. మండల సీజన్‌లో ప్రధాన ఘట్టమైన మండల పూజ డిసెంబర్ 27న నిర్వహించనున్నారు. ఆ తర్వాత ఆలయాన్ని మూసివేస్తారు. కాబట్టి భక్తులు ఈ తేదీలను దృష్టిలో ఉంచుకుని తమ ప్రయాణాన్ని ముందుగానే ప్రణాళిక చేసుకోవాలి. రైలు, బస్సు టికెట్లతో పాటు గది బుకింగ్ కూడా ముందే పూర్తి చేసుకుంటే యాత్ర మరింత సౌకర్యవంతంగా ఉంటుంది.
మరోవైపు ఆన్‌లైన్ బుకింగ్స్ విషయంలో భక్తులు అప్రమత్తంగా ఉండాలని దేవస్వం బోర్డు సూచిస్తోంది. గదుల రిజర్వేషన్ కోసం www.onlinetdb.com మాత్రమే అధికారిక వెబ్‌సైట్ అని స్పష్టం చేసింది. నకిలీ వెబ్‌సైట్లు, సోషల్ మీడియాలో వచ్చే అనధికారిక లింకులను నమ్మి డబ్బులు చెల్లించవద్దని హెచ్చరించింది. ముఖ్యంగా సైబర్ మోసాల పట్ల జాగ్రత్తగా ఉండాలని సూచించింది. ఆంధ్రప్రదేశ్, తెలంగాణ నుంచి కూడా ప్రతి ఏటా పెద్ద సంఖ్యలో అయ్యప్ప భక్తులు శబరిమలకు వెళ్తుంటారు. ఈ నేపథ్యంలో దేవస్వం బోర్డు అందించిన ఆన్‌లైన్ రూమ్ బుకింగ్ సదుపాయం భక్తులకు ఎంతగానో ఉపయోగపడనుంది.
ALSO READ: Sanju Samson | టీమిండియా స్టార్‌కు మరో ఛాన్స్.. కెప్టెన్‌గా ప్రమోషన్
