Shatrucharla Vijayarama Raju: ఉత్తరాంధ్ర రాజకీయాల్లో తనదైన ముద్ర వేసుకున్న ఓ సీనియర్ నేత ప్రస్థానం ముగిసింది. ప్రజా సమస్యలపై పోరాడుతూ, నాలుగు దశాబ్దాలకు పైగా రాజకీయాల్లో కీలక పాత్ర పోషించిన తెలుగుదేశం పార్టీ సీనియర్ నాయకుడు, మాజీ మంత్రి శత్రుచర్ల విజయరామరాజు కన్నుమూశారు. 78 ఏళ్ల వయసులో ఆయన తుదిశ్వాస విడవడంతో ఉత్తరాంధ్ర రాజకీయ వర్గాల్లో విషాదం నెలకొంది. కొంతకాలంగా అనారోగ్యంతో బాధపడుతున్న విజయరామరాజు విశాఖపట్నంలోని ఓ ప్రైవేటు ఆసుపత్రిలో చికిత్స పొందుతూ మరణించారు. 1948 ఆగస్టు 4న జన్మించిన ఆయన పార్వతీపురం మన్యం జిల్లా జియ్యమ్మవలస మండలం చినమేరంగి సంస్థానానికి చెందినవారు. ప్రజా సమస్యలపై రాజీలేని పోరాటం సాగించిన ఆయనకు ‘ఉత్తరాంధ్ర టైగర్’, ‘మన్యం పులి’ అనే పేర్లు గుర్తింపుగా నిలిచాయి. 1978లో జనతా పార్టీ తరఫున నాగూరు నియోజకవర్గం నుంచి తొలిసారి ఎమ్మెల్యేగా ఎన్నికై రాజకీయ ప్రస్థానాన్ని ప్రారంభించారు. ఆ తర్వాత కాంగ్రెస్, తెలుగుదేశం పార్టీల్లో పనిచేస్తూ తన రాజకీయ ప్రస్థానాన్ని కొనసాగించారు. ఆరుసార్లు ఎమ్మెల్యేగా, మూడుసార్లు పార్వతీపురం లోక్‌సభ స్థానం నుంచి ఎంపీగా ఎన్నికై ప్రజలకు సేవలందించారు.
దివంగత వైఎస్ రాజశేఖరరెడ్డి మంత్రివర్గంలో అటవీ, పర్యావరణ శాఖ మంత్రిగా, కొణిజేటి రోశయ్య ప్రభుత్వంలో రవాణా శాఖ మంత్రిగా బాధ్యతలు చేపట్టారు. 2017లో టీడీపీ తరఫున శ్రీకాకుళం స్థానిక సంస్థల కోటాలో ఎమ్మెల్సీగా ఏకగ్రీవంగా ఎన్నికై 2023 వరకు కొనసాగారు. ఆయన మృతి పట్ల పలువురు రాజకీయ ప్రముఖులు, వివిధ పార్టీల నేతలు తీవ్ర దిగ్భ్రాంతి వ్యక్తం చేస్తూ నివాళులర్పిస్తున్నారు. ఆయన కుటుంబ సభ్యులకు ప్రగాఢ సానుభూతి తెలియజేస్తున్నారు. అంత్యక్రియల వివరాలను కుటుంబ సభ్యులు త్వరలో వెల్లడించనున్నారు. నాలుగు దశాబ్దాలకు పైగా ప్రజా జీవితంలో కొనసాగిన శత్రుచర్ల విజయరామరాజు మరణం ఉత్తరాంధ్ర రాజకీయాలకు తీరని లోటుగా మిగిలిపోనుంది.
ALSO READ: Nampally Court | నాంపల్లి కోర్టుకు సీఎం రేవంత్ రెడ్డి
