Virat Kohli jersey gift: క్రికెట్ అంటే కేవలం పరుగులు, వికెట్లు, విజయాలు మాత్రమే కాదు.. మైదానంలో ఆటగాళ్లు చూపించే క్రీడాస్ఫూర్తి కూడా అంతే ముఖ్యం. ప్రత్యర్థి బౌలర్ తనను డకౌట్ చేసినప్పటికీ, అతని ప్రతిభను గౌరవిస్తూ టీమిండియా స్టార్ విరాట్ కోహ్లీ తీసుకున్న నిర్ణయం ఇప్పుడు క్రికెట్ అభిమానుల మనసులు గెలుచుకుంటోంది. న్యూజిలాండ్ పేసర్ మాట్ హెన్రీకి విరాట్ కోహ్లీ తన జెర్సీని బహుమతిగా అందించాడు. మ్యాచ్ ముగిసిన అనంతరం జరిగిన ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది. మైదానంలో ప్రత్యర్థులుగా తలపడినప్పటికీ, ఆట ముగిసిన తర్వాత పరస్పర గౌరవం ఎంత ముఖ్యమో కోహ్లీ మరోసారి నిరూపించాడు.
బే ఓవల్ వేదికగా జరిగిన నాలుగో వన్డేలో న్యూజిలాండ్ బౌలర్ మాట్ హెన్రీ భారత బ్యాటింగ్‌పై పంజా విసిరాడు. కేవలం 27 పరుగులే ఇచ్చి ఆరు వికెట్లు పడగొట్టి టీమిండియాను తీవ్రంగా దెబ్బతీశాడు. ముఖ్యంగా ఇన్నింగ్స్ తొలి ఓవర్లోనే రోహిత్ శర్మ, విరాట్ కోహ్లీ, శ్రేయస్ అయ్యర్‌లను డకౌట్ చేయడం మ్యాచ్‌లో కీలక మలుపుగా మారింది. హెన్రీ వేసిన ఐదో బంతికి కోహ్లీ బౌల్డ్ అయ్యాడు. నాలుగు బంతులు ఎదుర్కొన్న విరాట్ పరుగుల ఖాతా తెరవకుండానే పెవిలియన్ చేరాడు. అనంతరం శ్రేయస్ అయ్యర్ కూడా గోల్డెన్ డకౌట్‌గా వెనుదిరిగాడు. దీంతో భారత జట్టు ఆరంభంలోనే కోలుకోలేని దెబ్బ తింది. వన్డేల్లో భారత్ తొలి మూడు వికెట్లను ఒక్క పరుగు కూడా చేయకుండానే కోల్పోవడం ఇదే తొలిసారిగా నమోదైంది.. మొత్తంగా ఆరు వికెట్లతో తన కెరీర్‌లో అత్యుత్తమ వన్డే బౌలింగ్ ప్రదర్శనను నమోదు చేశాడు. ఫలితంగా భారత్ 244 పరుగుల భారీ తేడాతో ఓటమి పాలైంది. మ్యాచ్ అనంతరం హెన్రీ మాట్లాడుతూ.. మైదానంలో వీచిన బలమైన గాలులు బౌలింగ్‌కు అనుకూలించాయని తెలిపాడు. స్వింగ్‌పై ఎక్కువగా ఆధారపడకుండా, తొలి బంతి నుంచే స్టంప్స్‌ను లక్ష్యంగా చేసుకుని బౌలింగ్ చేసినట్లు వెల్లడించాడు.చివరగా.. మ్యాచ్‌లో ఎవరు గెలిచారు, ఎవరు ఓడిపోయారు అన్నది ఒకవైపు అయితే.. ప్రత్యర్థి ప్రతిభను గుర్తించి గౌరవించడం మరోవైపు. మాట్ హెన్రీకి కోహ్లీ అందించిన జెర్సీ బహుమతి క్రికెట్‌లో నిజమైన క్రీడాస్ఫూర్తికి నిదర్శనంగా నిలుస్తోంది.
