CM Chandrababu Naidu: ప్రభుత్వ సేవలు మరింత సమర్థంగా, ప్రజలకు చేరువగా అందాలంటే ఉద్యోగుల నైపుణ్యాలను ఎప్పటికప్పుడు పెంచాల్సిన అవసరం ఉందని ఏపీ CM చంద్రబాబు నాయుడు స్పష్టం చేశారు. ఉద్యోగులకు ఇచ్చే స్కిల్ డెవలప్‌మెంట్‌ శిక్షణ(Skill Development Training) ఒక్కసారితో ముగిసిపోకుండా నిరంతర ప్రక్రియగా కొనసాగాలని అధికారులను ఆదేశించారు. క్యాంపు కార్యాలయంలో వివిధ శాఖల సేవలపై ఉన్నతాధికారులతో సీఎం చంద్రబాబు సమీక్ష నిర్వహించారు. ఈ సందర్భంగా ప్రభుత్వ ఉద్యోగులకు నైపుణ్య శిక్షణ, అన్న క్యాంటీన్ల నిర్వహణ, పట్టణ ప్రాంతాల్లో తాగునీటి సదుపాయాలు, సంక్షేమ హాస్టళ్లలో వసతులపై ప్రధానంగా చర్చించారు.
ఉద్యోగులకు అవసరమైన ఆధునిక నైపుణ్యాలను అందించేందుకు ప్రతిష్ఠాత్మక విద్యాసంస్థలతో భాగస్వామ్యం కావాలని సీఎం సూచించారు. ముఖ్యంగా ఐఐటీలు, ఐఐఎంలతో అనుసంధానం చేసుకుని ఉద్యోగులకు అవసరమైన శిక్షణ కార్యక్రమాలను రూపొందించాలని ఆదేశించారు. మారుతున్న పరిస్థితులకు అనుగుణంగా ఉద్యోగుల సామర్థ్యాన్ని పెంచితే ప్రభుత్వ సేవల నాణ్యత కూడా మెరుగుపడుతుందని ఆయన పేర్కొన్నారు. అన్న క్యాంటీన్లు, పట్టణ తాగునీటి సౌకర్యాలు, సంక్షేమ హాస్టళ్లలో వసతులపైనా అధికారులు ప్రత్యేక దృష్టి పెట్టాలని సీఎం సూచించారు. ప్రజలకు మెరుగైన సేవలు అందించడంతో పాటు సంక్షేమ కార్యక్రమాల అమలులో ఎలాంటి లోటుపాట్లు లేకుండా చర్యలు తీసుకోవాలని ఆదేశించారు. సమావేశంలో రాష్ట్ర ప్రభుత్వ ప్రధాన కార్యదర్శి జి. సాయిప్రసాద్‌తో పాటు పలువురు ఉన్నతాధికారులు పాల్గొన్నారు. ప్రభుత్వ యంత్రాంగాన్ని మరింత సమర్థవంతంగా తీర్చిదిద్దేందుకు నైపుణ్యాభివృద్ధిని నిరంతర ప్రక్రియగా కొనసాగించడమే లక్ష్యంగా ఈ సమీక్ష సాగింది.
ALSO READ: INDIA Alliance | ఈసీపై పోరుకు ఇండియా కూటమి రెడీ.. అక్టోబర్ 6న భారీ మార్చ్
