SS Rajamouli Ramayana Review: భారతీయ సినీ ప్రేక్షకులు ఎంతో ఆసక్తిగా ఎదురుచూస్తున్న ప్రతిష్టాత్మక చిత్రం ‘రామాయణం’పై తాజాగా దర్శకధీరుడు ఎస్.ఎస్. రాజమౌళి తన అభిప్రాయాలను వెల్లడించారు. ఈ సినిమా విజువల్స్, నటీనటుల పెర్ఫార్మెన్స్ తనను ఎంతగానో ఆకట్టుకున్నాయని ప్రశంసించారు. సినిమా కథా పరిధి, భారీ నిర్మాణ విలువలు, వెండితెరపై ఆవిష్కరించిన అద్భుతమైన దృశ్యాలు ప్రత్యేకంగా నిలిచాయని రాజమౌళి పేర్కొన్నారు. ముఖ్యంగా రాముడి పాత్రలో రణబీర్ కపూర్ నటన ఆకట్టుకుందని అన్నారు. వనవాస ఘట్టం నుంచి ఆయన పాత్రలో కనిపించిన ప్రశాంతత, గంభీరత అద్భుతంగా ఉన్నాయని అభిప్రాయపడ్డారు.
ఇక రావణుడి పాత్రలో యశ్ తనదైన శైలిలో భయానకమైన ప్రభావాన్ని చూపించారని ప్రశంసించారు. సీత పాత్రలో సాయిపల్లవి హుందాతనం, సహజమైన అభినయం తనకు నచ్చాయని తెలిపారు. ముఖ్యంగా ప్రీ క్లైమాక్స్, క్లైమాక్స్ సన్నివేశాలు తనను విశేషంగా ఆకట్టుకున్నాయని వెల్లడించారు. ఇంతటి భారీ కథాంశాన్ని గొప్ప విజువల్ అనుభూతిగా మలిచిన నిర్మాత నమిత్ మల్హోత్రా, దర్శకుడు నితీష్ తివారీతో పాటు చిత్ర బృందం మొత్తాన్ని రాజమౌళి అభినందించారు. మొత్తంగా, ‘రామాయణం’ చిత్రంపై రాజమౌళి చేసిన ఈ ప్రశంసలు సినిమాపై ప్రేక్షకుల్లో మరింత ఆసక్తిని పెంచుతున్నాయి. ముఖ్యంగా భారతీయ ఇతిహాసాన్ని అంతర్జాతీయ స్థాయి విజువల్స్‌తో తెరకెక్కిస్తున్న ఈ చిత్రం వెండితెరపై ఎలాంటి సంచలనం సృష్టిస్తుందో చూడాలి.
