Ilaiyaraaja | సంగీత దర్శకుడు ఇళయరాజాకు ఎదురుదెబ్బ.. కాపీరైట్ వివాదంలో కోర్టు కీలక నిర్ణయం

Ilaiyaraaja: ప్రఖ్యాత సంగీత దర్శకుడు ఇళయరాజాకు కాపీరైట్ వివాదంలో ఢిల్లీ హైకోర్టులో ఎదురుదెబ్బ తగిలింది. ప్రముఖ సంగీత సంస్థ సరిగమ ఇండియా లిమిటెడ్‌తో కొనసాగుతున్న న్యాయపోరులో ఆయన దాఖలు చేసిన కీలక అభ్యర్థనను కోర్టు తిరస్కరించింది. గతంలో జారీ చేసిన మధ్యంతర ఉత్తర్వులను కొనసాగిస్తూ, వాటిని రద్దు చేయాలన్న ఇళయరాజా విజ్ఞప్తిని హైకోర్టు అంగీకరించలేదు.

ఈ వివాదం దశాబ్దాల క్రితం విడుదలైన 134 చిత్రాల పాటలకు సంబంధించిన కాపీరైట్ హక్కులపై కొనసాగుతోంది. ఇందులో ఇళయరాజా సంగీతం అందించిన అనేక క్లాసిక్ చిత్రాల పాటలు ఉన్నాయి. ఆయా చిత్రాల సంగీతం, సౌండ్ రికార్డింగ్స్, సాహిత్యానికి సంబంధించిన హక్కులు తమవేనని సరిగమ సంస్థ కోర్టులో వాదిస్తోంది.

సంస్థ వాదన ప్రకారం, 1976 నుంచి 2001 మధ్య వివిధ చిత్రాల నిర్మాతలతో కుదుర్చుకున్న ఒప్పందాల ద్వారా సంబంధిత పాటలపై పూర్తి హక్కులు తమకు లభించాయి. అయితే ఇటీవల కొన్ని డిజిటల్ మ్యూజిక్ ప్లాట్‌ఫారమ్‌లలో అదే పాటలపై ఇళయరాజా యాజమాన్య హక్కులు ప్రకటించడం, ఇతరులకు లైసెన్సులు ఇచ్చే ప్రయత్నాలు చేయడం వల్ల న్యాయస్థానాన్ని ఆశ్రయించాల్సి వచ్చిందని సరిగమ పేర్కొంది.

ఈ నేపథ్యంలో గతంలో కోర్టు ఇళయరాజాపై మధ్యంతర ఆదేశాలు జారీ చేసింది. ఆ ఉత్తర్వులను రద్దు చేయాలని ఆయన కోరినా, విచారణ అనంతరం కోర్టు ఆ విజ్ఞప్తిని తిరస్కరించింది. దీంతో కేసు తుది తీర్పు వచ్చే వరకు సంబంధిత 134 చిత్రాల పాటలపై యాజమాన్య హక్కులు ప్రకటించడం లేదా ఇతరులకు లైసెన్స్ ఇవ్వడం ఇళయరాజాకు సాధ్యం కాదని స్పష్టమైంది. ఈ కేసు భారతీయ సంగీత రంగంలో కాపీరైట్ హక్కులపై కీలక చర్చకు దారితీసే అవకాశముందని న్యాయ నిపుణులు అభిప్రాయపడుతున్నారు.