Black Hole: అంతరిక్షంలో ఎన్నో వింతలు, మరెన్నో అంతుచిక్కని రహస్యాలు దాగి ఉన్నాయి. వాటిలో కృష్ణబిలాలు (బ్లాక్‌హోల్స్‌) గురించి శాస్త్రవేత్తలు ఇప్పటికీ పరిశోధనలు కొనసాగిస్తున్నారు. సాధారణంగా రెండు బ్లాక్‌హోల్స్‌ దగ్గరై కలిసిపోవడం గురించి వింటుంటాం. కానీ, ఒకే కృష్ణబిలం రెండుగా విడిపోవడం సాధ్యమేనా? తాజాగా వెలువడిన ఓ పరిశోధన ఈ ఆసక్తికరమైన ప్రశ్నకు కొత్త కోణాన్ని పరిచయం చేసింది.
బ్లాక్‌హోల్‌ విడిపోవడానికి అడ్డంకి ఏంటి?
సాధారణ పరిస్థితుల్లో ఒక కృష్ణబిలం రెండు చిన్న బ్లాక్‌హోల్స్‌గా మారడం దాదాపు అసాధ్యంగా భావిస్తారు. దీనికి ప్రధాన కారణం థర్మోడైనమిక్స్‌లోని ఎంట్రోపీ సూత్రం. ఒక తిరుగని బ్లాక్‌హోల్‌ను రెండు చిన్న కృష్ణబిలాలుగా విభజిస్తే మొత్తం ఎంట్రోపీ తగ్గుతుంది. ప్రకృతి సహజంగా ఎంట్రోపీ తగ్గే మార్పులను అనుమతించదు. అందువల్ల ఇలాంటి విభజనకు భౌతిక శాస్త్ర నియమాలు అడ్డుగా నిలుస్తాయి.
అసాధారణ వేగమే కీలకమా?
ఇటలీలోని యూనివర్సిటీ ఆఫ్ నాపిల్స్ ఫెడెరికో II, డెన్మార్క్ సదర్న్ యూనివర్సిటీ పరిశోధకులు ఈ అంశంపై అధ్యయనం చేశారు. వారి గణనల ప్రకారం, అత్యంత వేగంగా తిరిగే బ్లాక్‌హోల్స్‌లో ఈ విభజనకు కొంత అవకాశం ఉండవచ్చు. అయితే విడిపోయిన రెండు కృష్ణబిలాలు తిరిగి కలవకుండా తగినంత దూరం ప్రయాణించాల్సి ఉంటుంది. ఈ నిబంధనను పరిగణనలోకి తీసుకుంటే ఆ అవకాశం మరింత పరిమితమవుతుందని పరిశోధకుడు ఫ్రాన్సిస్కో సన్నినో వెల్లడించారు.
ప్యాంటుల ఆకారంలో బ్లాక్‌హోల్‌!
ఈ అధ్యయనానికి ‘When Black Holes Admit Pair-of-pants Topologies’ అనే పేరు పెట్టారు. ఒక కృష్ణబిలం విభజన సమయంలో దాని ఈవెంట్ హారిజన్ మొదట ఒకటిగా ఉండి, ఆ తర్వాత రెండు భాగాలుగా మారే ప్రక్రియను పరిశోధకులు వివరించారు. కాలంతో పాటు ఈ నిర్మాణం ప్యాంటు ఆకారాన్ని పోలి ఉండటంతో దీనికి ‘పెయిర్ ఆఫ్ ప్యాంట్స్ టోపాలజీ’ అనే పేరు వచ్చింది.
చిన్న బ్లాక్‌హోల్స్‌పై ప్రత్యేక దృష్టి
అదనపు పరిమాణాలు కలిగిన విశ్వ నమూనాలను కూడా పరిశోధకులు పరిశీలించారు. ముఖ్యంగా ఆదికాలంలో ఏర్పడిన చిన్న కృష్ణబిలాలు అస్థిరంగా మారి విడిపోయే అవకాశం ఉండొచ్చని అంచనా వేస్తున్నారు. ఫెర్మీ-ఎల్‌ఏటీ వంటి గామా కిరణాల టెలిస్కోపుల ద్వారా ఇలాంటి సంఘటనలకు సంబంధించిన సంకేతాలను గుర్తించగలమా అనే దిశగా పరిశోధనలు సాగుతున్నాయి. మొత్తంగా, బ్లాక్‌హోల్‌ రెండుగా విడిపోవడం ప్రస్తుతానికి నిరూపితమైన ఖగోళ సంఘటన కాదు. అత్యంత ప్రత్యేకమైన పరిస్థితుల్లో మాత్రమే ఇది సాధ్యమయ్యే అవకాశం ఉందని పరిశోధన సూచిస్తోంది. ఈ సిద్ధాంతానికి పరిశీలనల ద్వారా ఆధారాలు లభిస్తే, విశ్వ నిర్మాణం, కృష్ణబిలాల పరిణామంపై మన అవగాహనలో కీలక మార్పులు రావచ్చు.
