Delimitation Bill: దేశ రాజకీయ వ్యవస్థపై దీర్ఘకాలిక ప్రభావం చూపే డీలిమిటేషన్ ప్రక్రియను ముందుకు తీసుకెళ్లేందుకు కేంద్ర ప్రభుత్వం మళ్లీ సన్నాహాలు ప్రారంభించినట్లు సమాచారం. రాబోయే పార్లమెంట్(Parliament) వర్షాకాల సమావేశాల్లో కొత్త డీలిమిటేషన్ బిల్లును ప్రవేశపెట్టే అవకాశాలు కనిపిస్తున్నాయి.
పార్లమెంట్ నియోజకవర్గాల పునర్విభజనతో పాటు భవిష్యత్తు ఎన్నికల ప్రాతినిధ్య నిర్మాణంలో కీలక మార్పులు చోటుచేసుకునే అవకాశం ఉంది. గతంలో ఈ అంశానికి సంబంధించిన బిల్లులు పార్లమెంట్లో అవసరమైన మద్దతు పొందలేక నిలిచిపోయాయి. ఈ అంశంపై భిన్న రాజకీయ పార్టీల మధ్య సమన్వయం సాధించేందుకు కేంద్ర ప్రభుత్వం ముందుగానే చర్చల బాట పట్టినట్లు రాజకీయ వర్గాలు పేర్కొంటున్నాయి.
ముఖ్యంగా ప్రాంతీయ పార్టీల ఆందోళనలను పరిగణనలోకి తీసుకుని సమతుల్య విధానాన్ని రూపొందించడంపై దృష్టి సారించినట్లు తెలుస్తోంది. ప్రతిపాదిత మార్పుల ప్రకారం లోక్సభ స్థానాల సంఖ్యను గణనీయంగా పెంచే అంశం పరిశీలనలో ఉన్నట్లు సమాచారం. మహిళా ప్రాతినిధ్యాన్ని విస్తరించడమే కాకుండా భవిష్యత్తు జనాభా మార్పులకు అనుగుణంగా స్థానాల కేటాయింపును సవరించాలనే ఆలోచన కేంద్రం వద్ద ఉంది.
అయితే జనాభా నియంత్రణలో ముందున్న దక్షిణాది రాష్ట్రాలు తమ రాజకీయ ప్రాతినిధ్యం తగ్గిపోతుందనే ఆందోళన వ్యక్తం చేస్తున్నాయి. మరోవైపు దేశవ్యాప్తంగా సమాన ప్రాతినిధ్యం కల్పించాల్సిన అవసరాన్ని కేంద్రం ప్రస్తావిస్తోంది.
ఈ నేపథ్యంలో అన్ని రాష్ట్రాలకు ఆమోదయోగ్యమైన ఫార్ములాను రూపొందించడం ప్రభుత్వానికి పెద్ద సవాలుగా మారింది. 2029 సాధారణ ఎన్నికలకు ముందే ఈ ప్రక్రియను పూర్తి చేయాలనే లక్ష్యంతో కేంద్రం ముందుకు సాగుతున్నట్లు రాజకీయ విశ్లేషకులు అభిప్రాయపడుతున్నారు. డీలిమిటేషన్ అమలైతే దేశ ఎన్నికల రాజకీయాల్లో కీలక మార్పులకు ఇది నాంది కావచ్చని భావిస్తున్నారు.
ALSO READ: World Environment Day | పర్యావరణ దినోత్సవ సందర్బంగా… తల్లి పేరుతో మొక్క నాటిన పవన్ కళ్యాణ్
