Kusal Mendis: క్రికెట్‌లో ప్రతిభ ఒక్కటే సరిపోదు.. ఎదురయ్యే విమర్శలను తట్టుకుని నిలబడే పట్టుదల కూడా ఉండాలి. ఈ విషయాన్ని శ్రీలంక స్టార్ బ్యాటర్ కుశాల్ మెండిస్ తన కెరీర్‌తో నిరూపిస్తున్నాడు. ఒకప్పుడు వివాదాలు, నిషేధాలు, వరుస వైఫల్యాలతో వార్తల్లో నిలిచిన ఈ ఆటగాడు.. ఇప్పుడు పరుగుల వరద పారిస్తూ శ్రీలంక క్రికెట్‌లో తనకంటూ ప్రత్యేక గుర్తింపు సంపాదించుకున్నాడు. తాజాగా అంతర్జాతీయ క్రికెట్‌లో 13 వేల పరుగుల మైలురాయిని చేరుకుని మరో ఘనతను తన ఖాతాలో వేసుకున్నాడు. శ్రీలంక తరఫున అత్యధిక పరుగులు చేసిన టాప్-10 ఆటగాళ్ల జాబితాలోనూ చోటు సంపాదించాడు. అయితే ఈ స్థాయికి చేరుకోవడం మెండిస్‌కు అంత సులభం కాలేదు. 2020లో కారు ప్రమాద ఘటన, 2021లో ఇంగ్లండ్ పర్యటన సందర్భంగా బయోబబుల్ నిబంధనల ఉల్లంఘన కారణంగా నిషేధం ఎదుర్కోవడం అతడి కెరీర్‌పై ప్రభావం చూపాయి. మరోవైపు మైదానంలో నిలకడలేని ఆటతీరుతో అభిమానుల నుంచి విమర్శలు ఎదుర్కొన్నాడు.
కేవలం 21 ఏళ్ల వయసులోనే ఆస్ట్రేలియాపై టెస్టు సెంచరీ సాధించి తన ప్రతిభను చాటుకున్న మెండిస్‌పై భారీ అంచనాలు ఏర్పడ్డాయి. అయితే శ్రీలంక దిగ్గజాలు సంగక్కర, జయవర్ధనే, దిల్షాన్ రిటైర్మెంట్ తర్వాత జట్టు మార్పుల దశలోకి వెళ్లింది. ఆ సమయంలో జట్టు వైఫల్యాలకు మెండిస్ కూడా విమర్శలు ఎదుర్కొన్నాడు. 2022లో నిషేధం ముగిసిన తర్వాత మాత్రం తన ఆటతీరును పూర్తిగా మార్చుకున్నాడు. విమర్శలను పక్కనపెట్టి నిలకడగా పరుగులు సాధించడం ప్రారంభించాడు. మూడు ఫార్మాట్లలోనూ సత్తా చాటుతూ జట్టులో కీలక ఆటగాడిగా ఎదిగాడు. 2022 తర్వాత టెస్టులు, వన్డేల్లో అతడి బ్యాటింగ్ సగటు 40 పరుగులు దాటడం విశేషం. రావల్పిండిలో పాకిస్థాన్‌తో జరిగిన టెస్టులోనూ మెండిస్ తన అసాధారణ ప్రతిభను మరోసారి నిరూపించాడు. శ్రీలంక 155 పరుగులకే నాలుగు వికెట్లు కోల్పోయి కష్టాల్లో ఉన్న సమయంలో క్రీజులోకి వచ్చి జట్టును ఆదుకున్నాడు.
188 బంతుల్లో 10 ఫోర్లు, నాలుగు సిక్సర్లతో అజేయంగా 117 పరుగులు సాధించాడు. 152 బంతుల్లోనే శతకాన్ని పూర్తి చేసుకున్నాడు. ఇది అతడి టెస్టు కెరీర్‌లో 11వ సెంచరీ. అంతేకాదు, టెస్టు కెప్టెన్‌గా తొలి మ్యాచ్‌లోనే శతకం సాధించిన తొలి శ్రీలంక ఆటగాడిగా చరిత్ర సృష్టించాడు. మొత్తానికి.. ఒకప్పుడు వివాదాలతో సతమతమైన కుశాల్ మెండిస్ ఇప్పుడు తన బ్యాటింగ్‌తోనే విమర్శకుల నోళ్లు మూయిస్తున్నాడు. 13 వేల పరుగుల మైలురాయి, అరుదైన కెప్టెన్సీ రికార్డు అతడి కెరీర్‌లో మరో కీలక మలుపుగా నిలిచాయి. ఇదే నిలకడ కొనసాగిస్తే శ్రీలంక క్రికెట్ దిగ్గజాల జాబితాలో మరింత ఉన్నత స్థానాన్ని సంపాదించడం ఖాయం.
ALSO READ: Eeswara Rao Biography | ఎన్టీఆర్‌ను నేరుగా ప్రశ్నించిన సీనియర్ నటుడు ఈశ్వరరావు.. చివరికి ఏమైందంటే?
