US Iran Peace Agreement | జీ-7 వేదికగా భారీ పరిణామం.. అమెరికా-ఇరాన్ శాంతి ఒప్పందం

US Iran Peace Agreement: అంతర్జాతీయ రాజకీయాల్లో కీలక పరిణామం చోటుచేసుకుంది. దీర్ఘకాలంగా కొనసాగుతున్న అమెరికా, ఇరాన్ విభేదాలను తగ్గించే ప్రయత్నాల్లో భాగంగా రెండు దేశాల నేతలు కీలక అవగాహన ఒప్పందంపై సంతకాలు చేసినట్లు వైట్ హౌస్ వెల్లడించింది. ఈ ఒప్పందం ప్రపంచ దౌత్య రంగంలో పెద్ద మలుపుగా భావిస్తున్నారు.

ఫ్రాన్స్‌లోని వర్సయిల్స్‌లో జరిగిన జీ-7 సదస్సు సందర్భంగా ఈ కీలక పరిణామం వెలుగులోకి వచ్చింది. ఫ్రెంచ్ అధ్యక్షుడు ఇమ్మాన్యుయేల్ మాక్రాన్ ఏర్పాటు చేసిన విందు కార్యక్రమంలో పాల్గొన్న అమెరికా అధ్యక్షుడు డొనాల్డ్ ట్రంప్, ఇరాన్ అధ్యక్షుడు మసూద్ పెజెష్కియాన్‌తో కలిసి ఒక అవగాహన ఒప్పందంపై సంతకాలు చేశారు. దీనికి ముందే జూన్ 14న అమెరికా వైస్ ప్రెసిడెంట్ జేడీ వాన్స్, ఇరాన్ పార్లమెంట్ స్పీకర్ మహ్మద్ బాగెర్ గాలిబాఫ్ ఎలక్ట్రానిక్ విధానంలో సంతకాలు చేసినట్లు సమాచారం.

ఈ ఒప్పందానికి “ఇస్లామాబాద్ మెమోరాండం ఆఫ్ అండర్ స్టాండింగ్” అని పేరు పెట్టినట్లు తెలుస్తోంది. మొత్తం 14 అంశాలతో రూపొందించిన ఈ ఒప్పందం ప్రకారం, ఇరు దేశాల మధ్య శాంతి ప్రక్రియను ముందుకు తీసుకెళ్లేందుకు 60 రోజుల గడువు ప్రారంభమైంది. ఈ సమయంలో శాశ్వత శాంతి ఒప్పందానికి మార్గం సుగమం చేయనున్నారు.

ఒప్పందంలో భాగంగా మొదటి దశగా ఇరాన్ హార్ముజ్ జలసంధి ద్వారా నౌకాయానాన్ని పునరుద్ధరించనుండగా, అమెరికా ఇరాన్‌పై విధించిన నౌకాదళ పరిమితులను సడలించనుందని సమాచారం. ఈ చారిత్రక ఒప్పందానికి మధ్యవర్తిత్వం వహించిన పాకిస్తాన్ ప్రధాని షెహబాజ్ షరీఫ్ దీనిని “తక్షణ అమలులోకి వచ్చిన దౌత్య విజయంగా” అభివర్ణించారు.

అయితే ఒప్పందం అమలు విషయంలో కఠిన హెచ్చరికలు కూడా వెలువడ్డాయి. ఇరాన్ తన నిబద్ధతను ఉల్లంఘిస్తే తీవ్ర పరిణామాలు ఉంటాయని అమెరికా అధ్యక్షుడు డొనాల్డ్ ట్రంప్ స్పష్టం చేశారు. ఈ పరిణామంతో అంతర్జాతీయ సమాజం శాంతి దిశగా ఒక కీలక అడుగు పడిందని భావిస్తోంది.