Praggnanandhaa: నార్వేలో జరుగుతున్న ప్రతిష్ఠాత్మక చెస్ టోర్నమెంట్లో భారత యువ గ్రాండ్మాస్టర్ ప్రజ్ఞానంద అద్భుత ఫామ్తో దూసుకెళ్తున్నాడు. తాజాగా జరిగిన తొమ్మిదో రౌండ్లో ప్రపంచ చెస్ ఛాంపియన్ డి. గుకేశ్పై విజయం సాధించి వరుసగా మూడో క్లాసికల్ విజయాన్ని తన ఖాతాలో వేసుకున్నాడు.
నల్ల పావులతో ఆడిన ప్రజ్ఞానంద కేవలం 34 ఎత్తుల్లోనే గుకేశ్ను ఓడించడం విశేషంగా మారింది. ఇటీవల ప్రపంచ నంబర్ వన్ మాగ్నస్ కార్ల్సన్పై సంచలన విజయం సాధించిన అతను, అంతకుముందు అలిరెజా ఫిరౌజాపై కూడా గెలిచి తన ఫామ్ను నిరూపించాడు. ఐదో రౌండ్లో గుకేశ్ చేతిలో ఎదురైన ఓటమికి ఈసారి ప్రతీకారం తీర్చుకోవడం ప్రత్యేక ఆకర్షణగా నిలిచింది.
మ్యాచ్ అనంతరం ప్రజ్ఞానంద మాట్లాడుతూ, సమయాన్ని సమర్థంగా వినియోగించడం ఈ విజయాలకు కీలకమైందని తెలిపాడు. గతంలో టైమ్ ట్రబుల్ కారణంగా కీలక గేమ్లు చేజారిపోయాయని గుర్తుచేసిన అతను, ఈసారి పొరపాట్లు చేయకుండా స్థిరంగా ఆడినట్లు వివరించాడు. టోర్నమెంట్ ప్రారంభంలో పాయింట్ల పట్టికలో చివరి స్థానంలో ఉన్న ప్రజ్ఞానంద ఇప్పుడు టైటిల్ రేస్లోకి తిరిగి వచ్చాడు.
వరుసగా మూడు విజయాలతో తన స్థానాన్ని బలపరుచుకున్న అతను ప్రస్తుతం అగ్రస్థానంలో ఉన్న వెస్లీ సోకు కేవలం అర పాయింట్ దూరంలో ఉన్నాడు. మరోవైపు మహిళల విభాగంలో కజకిస్థాన్కు చెందిన బిబిసారా అస్సౌబయేవా టైటిల్ను ముందుగానే ఖాయం చేసుకుంది. భారత గ్రాండ్మాస్టర్లు దివ్యా దేశ్ముఖ్, కోనేరు హంపి చివరి స్థానాల్లో కొనసాగుతుండటం టోర్నమెంట్లో మరో కీలక అంశంగా మారింది. ప్రజ్ఞానంద ప్రదర్శన ప్రస్తుతం భారత చెస్ అభిమానుల్లో భారీ ఉత్సాహాన్ని నింపుతోంది.
