Rain Alert | అల్పపీడనం.. తెలుగు రాష్ట్రాలకు వాతావరణ శాఖ కీలక హెచ్చరిక

Rain Alert: తెలుగు రాష్ట్రాల్లో మండుతున్న ఎండల మధ్య వాతావరణ శాఖ ప్రజలకు చల్లని కబురు చెప్పింది. నైరుతి బంగాళాఖాతంలో ఏర్పడిన అల్పపీడనం ప్రభావంతో ఆంధ్రప్రదేశ్, తెలంగాణలో పలుచోట్ల వర్షాలు కురిసే అవకాశం ఉందని వాతావరణ శాఖ వెల్లడించింది. ఈ ప్రభావంతో కొన్ని ప్రాంతాల్లో ఉరుములు, మెరుపులతో కూడిన వర్షాలు, గంటకు 30–50 కిలోమీటర్ల వేగంతో ఈదురుగాలులు వీచే అవకాశం ఉంది.

అల్పపీడనానికి అనుబంధంగా ఉన్న ఉపరితల ఆవర్తనం సగటు సముద్ర మట్టానికి 4.5 కిలోమీటర్ల ఎత్తు వరకు విస్తరించి ఉంది. ఇది రాబోయే 48 గంటల్లో మరింత బలపడే అవకాశం ఉందని వాతావరణ నిపుణులు తెలిపారు. తూర్పు గాలుల ద్రోణి కూడా బంగాళాఖాతం నుంచి ఉత్తర తమిళనాడు, రాయలసీమ, కర్ణాటక మీదుగా విస్తరించి వర్షాలకు అనుకూల పరిస్థితులు సృష్టిస్తోంది.

ఉత్తర కోస్తా, దక్షిణ కోస్తా, రాయలసీమ ప్రాంతాల్లో మంగళవారం నుంచి గురువారం వరకు అక్కడక్కడ తేలికపాటి నుండి మోస్తరు వర్షాలు కురిసే అవకాశం ఉంది. కొన్ని చోట్ల ఉరుములు, మెరుపులు, బలమైన ఈదురుగాలులు వీచే అవకాశం ఉంది.

తెలంగాణలోనూ కొన్ని జిల్లాల్లో తేలికపాటి వర్షాలు కురిసే అవకాశం ఉండగా, తరువాతి రెండు రోజుల్లో పొడి వాతావరణం ఏర్పడే సూచనలు ఉన్నాయి. అయితే రాష్ట్రంలో ఉష్ణోగ్రతలు మళ్లీ 2 నుండి 4 డిగ్రీలు పెరిగే అవకాశం ఉందని హెచ్చరికలు ఉన్నాయి.

మొత్తం మీద రాబోయే రోజుల్లో ఎండల మధ్య తాత్కాలిక ఉపశమనం లభించినా, వాతావరణ మార్పుల కారణంగా ప్రజలు అప్రమత్తంగా ఉండాలని నిపుణులు సూచిస్తున్నారు.