TG-TET: తెలంగాణ ప్రభుత్వ, లోకల్ బాడీ పాఠశాలల్లో విధులు నిర్వహిస్తున్న టీచర్లకు విద్యాశాఖ నుంచి ముఖ్యమైన సమాచారం వెలువడింది. పదోన్నతులు, ఉద్యోగ సంబంధిత అర్హతల కోసం టెట్ అర్హత తప్పనిసరి అయిన నేపథ్యంలో ఇన్-సర్వీస్ టీచర్ల కోసం ప్రత్యేకంగా స్పెషల్ టీజీ-టెట్ నిర్వహించాలని ప్రభుత్వం నిర్ణయించింది. ఇప్పటికే ఉపాధ్యాయులుగా విధులు నిర్వహిస్తున్నప్పటికీ టెట్ అర్హత లేని వారికి మరో అవకాశం కల్పించాలనే ఉద్దేశంతో ఈ నిర్ణయం తీసుకున్నట్లు అధికారులు తెలిపారు. ఉపాధ్యాయ సంఘాల విజ్ఞప్తులు, ప్రజాప్రతినిధుల సూచనలు, పాఠశాల విద్యాశాఖ డైరెక్టర్ డాక్టర్ ఈ. నవీన్ నికోలస్ అందించిన నివేదికను పరిశీలించిన అనంతరం ప్రభుత్వం ఈ నిర్ణయానికి వచ్చింది.
ప్రత్యేక టెట్కు సంబంధించిన నోటిఫికేషన్ను ఈ నెల 21న విడుదల చేయనున్నట్లు విద్యాశాఖ అధికారులు వెల్లడించారు. అనంతరం సెప్టెంబర్ 7, 8, 9 తేదీల్లో స్పెషల్ టీజీ-టెట్ పరీక్షలను నిర్వహించనున్నారు. సాధారణ టెట్ పరీక్షలకు అదనంగా ఈ ప్రత్యేక పరీక్షను నిర్వహించడం ద్వారా ఇప్పటివరకు అర్హత సాధించలేకపోయిన ఉపాధ్యాయులకు అవకాశం లభించనుంది.
ముఖ్యంగా ప్రమోషన్ల కోసం ఎదురుచూస్తున్న టీచర్లకు ఈ నిర్ణయం ఎంతో ప్రయోజనం కలిగించనుంది. టెట్ అర్హత సాధించిన ఉపాధ్యాయులు తమ కెరీర్లో తదుపరి దశకు వెళ్లేందుకు ఈ పరీక్ష ఉపయోగపడనుంది. దీంతో రాష్ట్రవ్యాప్తంగా వేలాది మంది ఉపాధ్యాయులకు కొత్త అవకాశం లభించనుందని విద్యాశాఖ వర్గాలు భావిస్తున్నాయి.
