Future City project: తెలంగాణ ప్రభుత్వం ప్రతిష్టాత్మకంగా చేపట్టిన “ఫ్యూచర్ సిటీ” ప్రాజెక్ట్పై వేగంగా ముందడుగు వేస్తోంది. తాజాగా రాష్ట్ర మంత్రులు పొంగులేటి శ్రీనివాస్ రెడ్డి, దుద్దిళ్ల శ్రీధర్ బాబు నిర్మాణ పనులను పరిశీలించారు. ఫ్యూచర్ సిటీ అభివృద్ధి ద్వారా రాష్ట్ర యువతకు లక్షలాది ఉద్యోగాలు లభిస్తాయని మంత్రులు పేర్కొన్నారు.
ప్రపంచ స్థాయి ప్రమాణాలతో ఈ ప్రాజెక్టును గ్లోబల్ సిటీగా తీర్చిదిద్దే లక్ష్యంతో ప్రభుత్వం పని చేస్తోందని తెలిపారు. నిర్మాణంలో ఉన్న ఫ్యూచర్ సిటీ డెవలప్మెంట్ అథారిటీ కార్యాలయ భవనం, యంగ్ ఇండియా స్కిల్స్ యూనివర్సిటీ పనులను మంత్రులు పరిశీలించి సమీక్ష నిర్వహించారు. ప్రతి నిర్మాణం అంతర్జాతీయ ప్రమాణాలకు అనుగుణంగా ఉండేలా చర్యలు తీసుకుంటున్నట్లు వెల్లడించారు.
సీఎం రేవంత్ రెడ్డి విజన్తో ఈ ప్రాజెక్టును అత్యంత ప్రతిష్టాత్మకంగా ముందుకు తీసుకెళ్తున్నామని మంత్రులు తెలిపారు. ఇప్పటికే పోలీస్ కమిషనరేట్ ఏర్పాటు ప్రక్రియ ప్రారంభమైందని, అనేక ప్రభుత్వ కార్యాలయాలను కూడా ఫ్యూచర్ సిటీ నుంచే నిర్వహించేలా ప్రణాళికలు రూపొందిస్తున్నట్లు చెప్పారు.
యువతకు ప్రపంచ స్థాయి నైపుణ్యాలు అందించేందుకు యంగ్ ఇండియా స్కిల్స్ యూనివర్సిటీ ఏర్పాటు చేసినట్లు తెలిపారు. ప్రస్తుతం తాత్కాలిక క్యాంపస్లో కొనసాగుతున్న ఈ యూనివర్సిటీకి శాశ్వత క్యాంపస్ నిర్మాణం వేగంగా జరుగుతోందని పేర్కొన్నారు.
ఫ్యూచర్ సిటీ ద్వారా తెలంగాణ మాత్రమే కాకుండా దేశానికి కూడా ఒక మోడల్ సిటీగా నిలిచే అవకాశం ఉందని మంత్రులు అభిప్రాయపడ్డారు. ఈ ప్రాజెక్టు ద్వారా ఉపాధి, ఉద్యోగ భద్రత, ఆధునిక అభివృద్ధి వంటి అనేక అవకాశాలు అందుబాటులోకి వస్తాయని తెలిపారు.
