Ramayana Movie Review: భారతీయ సినీ చరిత్రలో అత్యంత ప్రతిష్ఠాత్మక చిత్రాల్లో ఒకటిగా ప్రచారం పొందిన ‘రామాయణం’ ప్రేక్షకుల ముందుకు వచ్చింది. వేల కోట్ల బడ్జెట్, భారీ తారాగణం, అంతర్జాతీయ స్థాయి విజువల్ ఎఫెక్ట్స్‌తో తెరకెక్కిన ఈ సినిమా ప్రేక్షకులకు ఎలాంటి అనుభూతిని అందించింది? ముఖ్యంగా రాముడిగా రణ్‌బీర్ కపూర్, రావణుడిగా యష్ ఎలా మెప్పించారు? ఇప్పుడు రివ్యూలో చూద్దాం.
కథ, కథనం ఎలా ఉన్నాయి?
వాల్మీకి రామాయణం ఆధారంగా దర్శకుడు నితీష్ తివారీ ఈ చిత్రాన్ని రూపొందించారు. రణ్‌బీర్ కపూర్, సాయిపల్లవి, యష్, సన్నీ డియోల్, అమితాబ్ బచ్చన్, కాజల్ అగర్వాల్, రకుల్ ప్రీత్ సింగ్, శోభన వంటి ప్రముఖ నటీనటులు ఇందులో కీలక పాత్రలు పోషించారు. నమిత్ మల్హోత్రా, యష్, చార్లెస్ రోవెన్ నిర్మాణంలో సుమారు రూ.4,000 కోట్ల భారీ వ్యయంతో ఈ ప్రాజెక్ట్ తెరకెక్కింది. రావణుడి పరిచయంతో ప్రారంభమయ్యే కథలో తొలి సన్నివేశాల నుంచే భారీ విజువల్స్ ఆకట్టుకుంటాయి. అయితే ప్రధాన పాత్రల పరిచయం, వాటి మధ్య సంబంధాలను బలంగా చూపించడంలో కథనం కొంత తడబడింది. కొన్ని సన్నివేశాలు నెమ్మదిగా సాగడంతో పాటు, భావోద్వేగాలు ప్రేక్షకులకు పూర్తిస్థాయిలో చేరవు. కొన్ని సందర్భాల్లో టీవీ సీరియల్ చూస్తున్న అనుభూతి కలుగుతుంది. రెండో భాగంలో ఈ సమస్య మరింత స్పష్టంగా కనిపిస్తుంది. యాక్షన్ సన్నివేశాలు ఆశించిన స్థాయిలో ఉత్కంఠను కలిగించలేకపోయాయి. సన్నివేశాల మధ్య భావోద్వేగ అనుసంధానం లోపించడంతో కథనం సాగదీసినట్లు అనిపిస్తుంది. క్లైమాక్స్ కొంత ఆసక్తిని పెంచినా, ముగింపు మాత్రం పూర్తి సంతృప్తిని ఇవ్వదు.
నటీనటులు, సాంకేతిక విభాగం
ఈ చిత్రానికి ప్రధాన ఆకర్షణ యష్ నటన. రావణుడి పాత్రలో ఆయన స్క్రీన్ ప్రజెన్స్, హావభావాలు ప్రత్యేక ఆకర్షణగా నిలుస్తాయి. రాముడిగా రణ్‌బీర్ కపూర్, సీతగా సాయిపల్లవి తమ పాత్రలకు న్యాయం చేశారు. మిగతా నటీనటులు కూడా తమ పాత్రల పరిధిలో మెప్పించారు. విజువల్స్, భారీ సెట్స్, గ్రాఫిక్స్ ఈ సినిమాకు ప్రధాన బలం. తెరపై సరికొత్త ప్రపంచాన్ని ఆవిష్కరించిన తీరు ఆకట్టుకుంటుంది. అయితే ఏఆర్ రెహమాన్, హాన్స్ జిమ్మర్ సంగీతం మాత్రం ఆశించిన స్థాయిలో ప్రభావం చూపించలేకపోయింది. మొత్తంగా చూస్తే ‘రామాయణం’ కళ్లు చెదిరే విజువల్స్‌తో భారీ సినిమాటిక్ అనుభూతిని అందించే ప్రయత్నం చేసింది. కానీ కథలో భావోద్వేగాలను బలంగా ఆవిష్కరించడంలో లోపాలు కనిపిస్తాయి. యష్ నటన, గ్రాఫిక్స్ కోసం ఒకసారి చూడొచ్చు. అయితే అద్భుతమైన కథనం, గాఢమైన భావోద్వేగాలను ఆశించే ప్రేక్షకులు తమ అంచనాలను కొంత తగ్గించుకోవాల్సిందే. విజువల్ గ్రాండియర్ ఉన్నా, కథలో ఆత్మ మరింత బలంగా ఉండాల్సిందనిపిస్తుంది.
ALSO READ: Ganga Water Treaty | గంగా జలాల ఒప్పందంపై భారత్ కీలక నిర్ణయం.. బంగ్లాదేశ్‌కు కొత్త షరతులు
