Ram Gopal Varma: నీట్ పరీక్షలపై దేశవ్యాప్తంగా కొనసాగుతున్న వివాదాల మధ్య దర్శకుడు రామ్ గోపాల్ వర్మ చేసిన ట్వీట్ సోషల్ మీడియాలో చర్చనీయాంశంగా మారింది. నీట్ లీకులు, పరీక్షల వివాదాల కంటే భవిష్యత్లో విద్యార్థులను ఎక్కువగా ప్రభావితం చేసేది AI విప్లవమేనని రామ్ గోపాల్ వర్మ అభిప్రాయపడ్డారు. ఒకప్పుడు మంచి మార్కులు, డిగ్రీలే విజయానికి మార్గమని భావించేవారని, కానీ ఇప్పుడు AI క్షణాల్లో సమాచారాన్ని అందించే స్థాయికి చేరడంతో సంప్రదాయ విద్యా విధానం కొత్త సవాళ్లను ఎదుర్కొంటోందని పేర్కొన్నారు.
ఇంజినీరింగ్, మెడిసిన్, లా, సీఏ, ఎంబీఏ వంటి వృత్తుల్లో కూడా AI ప్రభావం పెరుగుతుండటంతో ఉద్యోగాల స్వరూపం మారే అవకాశాలు ఉన్నాయని ట్వీట్లో ప్రస్తావించారు. భవిష్యత్తులో కేవలం డిగ్రీలు కాకుండా AIను సమర్థంగా వినియోగించే నైపుణ్యం, సమస్యలను పరిష్కరించే సామర్థ్యం, సృజనాత్మక ఆలోచన, నిరంతరంగా కొత్త విషయాలు నేర్చుకునే తత్వమే విజయాన్ని నిర్ణయిస్తాయని ఆయన అభిప్రాయపడ్డారు.
విద్యార్థులు, తల్లిదండ్రులు, ఉపాధ్యాయులు కూడా ఈ మార్పులకు అనుగుణంగా తమ ఆలోచనా విధానాన్ని మార్చుకోవాల్సిన అవసరం ఉందని సూచించారు. AI అన్ని ఉద్యోగాలను భర్తీ చేస్తుందా అనే అంశంపై భిన్నాభిప్రాయాలు ఉన్నప్పటికీ, AIతో కలిసి పనిచేసే నైపుణ్యాలు పెంపొందించుకోవడం మాత్రం అనివార్యమనే సందేశం ఆయన ట్వీట్లో కనిపించింది.
ALSO READ: Heavy rains | కృష్ణమ్మకు మళ్లీ జలకళ.. జూరాలకు పెరుగుతున్న వరద ప్రవాహం
