Oscars 2027: ఆస్కార్ రేసులో భారత్‌కు ఈసారి ఆసక్తికర పరిణామం ఎదురైంది. సాధారణంగా ఒక దేశం నుంచి అధికారికంగా ఎంపికైన సినిమా ‘ఇంటర్నేషనల్ ఫీచర్ ఫిల్మ్’ విభాగంలో ప్రాతినిధ్యం వహిస్తుంది. కానీ 99వ అకాడమీ అవార్డుల కోసం కొత్త అర్హత నిబంధనల కారణంగా భారతీయ సినిమాలకు మరో మార్గం కూడా తెరుచుకుంది. దీంతో మరాఠీ చిత్రం ‘గోంధళ్’ (Gondhal) అధికారిక ఎంట్రీగా నిలవగా.. నాగాలాండ్‌ నేపథ్యంలోని ‘అంగ్’(Angh) ప్రత్యేక నిబంధన ద్వారా ఆస్కార్ పరిశీలనకు అర్హత సాధించింది. సంతోష్ దావఖర్ దర్శకత్వంలో తెరకెక్కిన ‘గోంధళ్’ను ఫిల్మ్ ఫెడరేషన్ ఆఫ్ ఇండియా 33 సినిమాల నుంచి ఎంపిక చేసింది. మహారాష్ట్ర సంప్రదాయ ‘గోంధళ్’ జానపద ఆచారం చుట్టూ సాగే ఈ సినిమా థ్రిల్లర్ అంశాలతో రూపొందింది. ఈ ఎంపికతో 2027 ఆస్కార్‌కు ఇంటర్నేషనల్ ఫీచర్ ఫిల్మ్ విభాగంలో భారత్ అధికారికంగా ‘గోంధళ్’ను పంపుతోంది.
మరోవైపు తేజా రియో దర్శకత్వంలోని ‘అంగ్’కు ఆస్కార్ ప్రయాణం భిన్నంగా సాగింది. 99వ ఆస్కార్ నిబంధనల ప్రకారం.. ఎంపిక చేసిన అంతర్జాతీయ ఫిల్మ్ ఫెస్టివల్స్‌లో నిర్దిష్ట ప్రధాన అవార్డు గెలిచిన నాన్-ఇంగ్లిష్ సినిమాలకు దేశ అధికారిక ఎంట్రీతో సంబంధం లేకుండా ఇంటర్నేషనల్ ఫీచర్ ఫిల్మ్ విభాగంలో అర్హత పొందే అవకాశం కల్పించారు. ఆ జాబితాలో టొరంటో ఇంటర్నేషనల్ ఫిల్మ్ ఫెస్టివల్‌లోని ‘Platform Award’ కూడా ఉంది. అందుకే ‘అంగ్’కు లభించిన అంతర్జాతీయ గుర్తింపు ఈ ఆస్కార్ మార్గాన్ని తెరిచింది. అయితే ఆస్కార్‌కు అర్హత సాధించడం అంటే నామినేషన్ ఖరారైనట్లు కాదు. అర్హత పొందిన చిత్రాలు అకాడమీ తదుపరి పరిశీలన, ఓటింగ్, షార్ట్‌లిస్ట్, నామినేషన్ వంటి దశలను దాటాల్సి ఉంటుంది. ఇలా ఒక సినిమా దేశ అధికారిక ఎంపిక ద్వారా, మరో సినిమా ఫెస్టివల్ అవార్డు మార్గంలో ఆస్కార్ పరిశీలనకు రావడం భారతీయ సినిమాకు ప్రత్యేకమైన పరిణామంగా మారింది. ఇక ఈ రెండు చిత్రాల్లో ఏవి తదుపరి దశలకు చేరుతాయన్నది ఆసక్తికరంగా మారింది.
ALSO READ: India Japan T20 2026 | రేపే జపాన్‌తో టీమిండియా చారిత్రాత్మక టీ20
