TDP Working President: మంగళగిరిలోని ఎన్టీఆర్ భవన్లో టీడీపీ నూతన కార్యవర్గ ప్రమాణస్వీకారం వైభవంగా జరిగింది. పార్టీ అధ్యక్షుడు, ముఖ్యమంత్రి నారా చంద్రబాబు నాయుడు 252 మంది సభ్యులతో ప్రమాణస్వీకారం చేయించారు.
ఈ సందర్భంగా నారా లోకేష్ టీడీపీ జాతీయ వర్కింగ్ ప్రెసిడెంట్గా బాధ్యతలు స్వీకరించారు. సీనియారిటీ, నిబద్ధత ఆధారంగా సామాన్య కార్యకర్తలకు కూడా అవకాశం కల్పించామని చంద్రబాబు తెలిపారు.
కార్యకర్తలే పార్టీ బలం అని పేర్కొన్న ఆయన, ప్రతి బూత్ స్థాయిలో పార్టీని మరింత బలోపేతం చేయాలని పిలుపునిచ్చారు. గతంలో లోకేష్ చేపట్టిన ప్రక్షాళన చర్యలను ప్రశంసిస్తూ, వచ్చే ఎన్నికల్లో మరింత మెరుగైన ఫలితాల కోసం కృషి చేయాలని సూచించారు.
రాష్ట్ర అభివృద్ధిపై స్పందించిన సీఎం, ఆర్థిక పరిస్థితిని మెరుగుపరచి ఆంధ్రప్రదేశ్ను పెట్టుబడుల కేంద్రంగా మార్చుతున్నామని తెలిపారు. విశాఖపట్నాన్ని ఏఐ హబ్గా అభివృద్ధి చేయాలనే లక్ష్యాన్ని వెల్లడించారు. డీబీటీ ద్వారా సంక్షేమ పథకాలను సమయానికి అమలు చేస్తున్నామని చెప్పారు.
ప్రతిపక్ష వైసీపీపై విమర్శలు చేస్తూ, అభివృద్ధిని అడ్డుకునే ప్రయత్నాలు జరుగుతున్నాయని ఆరోపించారు. పార్టీ నేతలు చిన్న విషయాలపై వివాదాలకు దూరంగా ఉండాలని, బాధ్యతగా వ్యవహరించాలని సూచించారు. పార్టీ ప్రతిష్ఠను పెంచేలా ప్రతి ఒక్కరూ నడుచుకోవాలని చంద్రబాబు దిశానిర్దేశం చేశారు.
