MGNREGA workers: సోషల్ మీడియా ప్రభావం పల్లెల వరకు చేరడంతో రీల్స్ తయారీ సంస్కృతి వేగంగా పెరుగుతోంది. సాధారణ ప్రజలు తమ దైనందిన జీవన విధానం, పనులు, వేడుకలను వీడియోల రూపంలో రికార్డు చేసి సామాజిక మాధ్యమాల్లో పంచుకుంటూ విస్తృతమైన గుర్తింపు సంపాదిస్తున్నారు. ఈ నేపథ్యంలో ఉపాధి హామీ పనులు కూడా ఇటీవల సోషల్ మీడియాలో ప్రత్యేక ఆకర్షణగా మారాయి.
పని ప్రదేశాల్లో కూలీలు సంప్రదాయ వేడుకలు, పండుగల ఆచారాలు, పుట్టినరోజు సంబరాలు వంటి కార్యక్రమాలను నిర్వహిస్తూ వాటిని వీడియోలుగా రూపొందించి ఆన్లైన్లో పంచుకుంటున్నారు. ఈ క్రమంలో తాజాగా ఒక హృదయానికి హత్తుకునే ఘటన వెలుగులోకి వచ్చింది. నిజామాబాద్ జిల్లా పురానిపేట గ్రామంలో ఉపాధి హామీ పనులకు హాజరైన తోట రాజన్న, తోట నర్సు అనే వృద్ధ దంపతులకు సహచర కూలీలు ప్రత్యేకంగా షష్టిపూర్తి వేడుక నిర్వహించారు. పనిప్రదేశంలోనే తాత్కాలికంగా పీటలు ఏర్పాటు చేసి సంప్రదాయంగా ఈ కార్యక్రమాన్ని జరిపారు.
సహకారంగా ఉన్న కూలీలు అందరూ పాల్గొని ఆ దంపతులకు శుభాకాంక్షలు తెలిపారు. ఈ దృశ్యాలు సోషల్ మీడియాలో వైరల్ కావడంతో నెటిజన్ల నుంచి భిన్న స్పందనలు వస్తున్నాయి. కొందరు ఈ సంఘటనను మానవత్వానికి ప్రతీకగా అభివర్ణిస్తుండగా, మరికొందరు ఉపాధి హామీ పథకం అసలు లక్ష్యానికి ఇది విరుద్ధంగా మారుతోందని అభిప్రాయపడుతున్నారు. ప్రభుత్వం గ్రామీణ పేదలకు ఉపాధి కల్పించాలనే ఉద్దేశంతో అమలు చేస్తున్న ఈ పథకం, ఇలా సోషల్ మీడియా కంటెంట్గా మారడం సరైందా కాదా అనే అంశంపై ప్రస్తుతం చర్చ కొనసాగుతోంది.
ALSO READ: Delhi Airport | ఢిల్లీ విమానాశ్రయంలో గాలుల బీభత్సం.. మూడు విమానాలు ధ్వంసం
