KTM 200 Duke: స్పోర్ట్స్ బైక్ సెగ్మెంట్‌లో తనదైన గుర్తింపు తెచ్చుకున్న KTM.. 200 Dukeను మరిన్ని అధునాతన ఫీచర్లతో అప్‌డేట్ చేసి భారత మార్కెట్లోకి తీసుకొచ్చింది. స్వల్పంగా ధర పెంచినప్పటికీ, రైడింగ్ అనుభవాన్ని మరింత మెరుగుపరిచే ఆధునిక ఎలక్ట్రానిక్ ఫీచర్లను ఇందులో అందుబాటులోకి తీసుకొచ్చింది.
కొత్త KTM 200 Duke ధర ఎంత?
ఢిల్లీలో అప్‌డేట్ చేసిన KTM 200 Duke ఎక్స్‌షోరూమ్ ధర రూ.2,07,140గా నిర్ణయించారు. గత మోడల్‌తో పోలిస్తే ధర రూ.1,552 పెరిగింది. అయితే ఈ అదనపు ధరకు బదులుగా పలు కీలక సాంకేతిక ఫీచర్లు లభించడం విశేషం.
కొత్త ఫీచర్లతో మరింత మెరుగైన రైడింగ్
ఈ బైక్‌లో రైడ్-బై-వైర్ థ్రాటిల్, బై-డైరెక్షనల్ క్విక్‌షిఫ్టర్(Quickshifter), ట్రాక్షన్ కంట్రోల్, రెండు రైడింగ్ మోడ్‌లను స్టాండర్డ్‌గా అందించారు. క్లచ్‌ను ఉపయోగించకుండా క్విక్‌షిఫ్టర్ ద్వారా గేర్లను పైకి, కిందికి మార్చుకోవచ్చు. స్ట్రీట్, రెయిన్ మోడ్‌లు రహదారి పరిస్థితులకు అనుగుణంగా పవర్ డెలివరీని సర్దుబాటు చేసేందుకు ఉపయోగపడతాయి. ట్రాక్షన్ కంట్రోల్ వెనుక చక్రం జారిపోయే ప్రమాదాన్ని తగ్గించడంలో సహాయపడుతుంది. అప్‌డేట్ చేసిన TFT ఇన్‌స్ట్రుమెంట్ డిస్‌ప్లే ద్వారా ఈ ఫీచర్ల సెట్టింగులను నిర్వహించవచ్చు. ట్రాఫిక్‌లో నెమ్మదిగా ప్రయాణించే సమయంలో రైడర్ అలసటను తగ్గించేందుకు క్రాల్ అసిస్ట్ ఫీచర్‌ను కూడా KTM పరిచయం చేసింది.
ఇంజిన్, రంగుల్లోనూ ప్రత్యేకత
ఈ మోటార్‌సైకిల్‌లో 199.5 సీసీ, సింగిల్ సిలిండర్, లిక్విడ్ కూల్డ్ ఇంజిన్ కొనసాగుతోంది. ఇది 25 PS గరిష్ఠ శక్తిని, 19.3 Nm టార్క్‌ను ఉత్పత్తి చేస్తుంది. ఆరు గేర్ల ట్రాన్స్‌మిషన్‌తో వస్తున్న ఈ బైక్‌లో 43 మిమీ WP అప్‌సైడ్ డౌన్ ఫ్రంట్ ఫోర్కులు, 320 మిమీ ఫ్రంట్ బ్రేక్ డిస్క్ వంటి ప్రత్యేకతలు ఉన్నాయి. ఇక కొత్తగా లిక్విడ్ కార్బన్, స్లేట్ గ్రే రంగులను అందుబాటులోకి తీసుకొచ్చారు. వీటిలో పూర్తిగా నలుపు రంగు డిజైన్‌తో ఉన్న లిక్విడ్ కార్బన్ వేరియంట్ బైక్‌కు మరింత స్పోర్టీ లుక్‌ను అందించనుంది. మొత్తంగా చూస్తే, KTM 200 Dukeలో ఇంజిన్ పనితీరును మార్చకుండా ఎలక్ట్రానిక్ ఫీచర్లు, రైడర్ నియంత్రణకు ప్రాధాన్యం ఇచ్చారు. రూ.2.07 లక్షల ఎక్స్‌షోరూమ్ ధరతో అందుబాటులోకి వచ్చిన కొత్త KTM 200 Duke, అధునాతన ఫీచర్లను కోరుకునే బైక్ ప్రియులను ఆకట్టుకునే అవకాశం ఉంది. రోజువారీ ప్రయాణాల్లో ఈ కొత్త టెక్నాలజీ ఎంతవరకు ఉపయోగపడుతుందో రైడర్ల అనుభవమే తేల్చనుంది.
ALSO READ: AP Weather | ఏపీ తీరానికి మరో తుఫాన్‌ ముప్పు? అల్పపీడనంపై IMD కీలక హెచ్చరిక
