AP Cabinet Meeting: ఆంధ్రప్రదేశ్‌ను పారిశ్రామికంగా మరింత బలోపేతం చేయడంతో పాటు భారీగా ఉద్యోగ అవకాశాలు కల్పించడమే లక్ష్యంగా కూటమి ప్రభుత్వం కీలక అడుగులు వేస్తోంది. ఈ నేపథ్యంలో సీఎం చంద్రబాబు నాయుడు అధ్యక్షతన జరిగిన వర్చువల్ క్యాబినెట్ భేటీలో పలు కీలక నిర్ణయాలు తీసుకోవడంతో పాటు, అనేక ప్రతిపాదనలకు మంత్రివర్గం ఆమోదముద్ర వేసింది.
రూ.35 వేల కోట్ల పెట్టుబడులకు ప్రోత్సాహం
ఈ సమావేశానికి డిప్యూటీ సీఎం పవన్ కల్యాణ్‌తో పాటు ఇతర మంత్రులు వర్చువల్‌గా హాజరయ్యారు. మంత్రివర్గ సమావేశంలో దాదాపు 48 ప్రతిపాదనలకు ఆమోదం లభించింది. వీటిలో రాష్ట్రానికి సుమారు రూ.35 వేల కోట్ల పెట్టుబడులను తీసుకొచ్చే పారిశ్రామిక ప్రాజెక్టులు, అభివృద్ధి పథకాలకు ప్రభుత్వం ప్రాధాన్యం ఇచ్చింది. రాష్ట్రంలో పారిశ్రామికాభివృద్ధిని వేగవంతం చేసి, యువతకు ఉపాధి అవకాశాలను పెంచడంపై ప్రభుత్వం ప్రత్యేక దృష్టి సారించింది.
గ్రీన్ స్టీల్, సెమీకండక్టర్ రంగాలకు ప్రాధాన్యం
విజయనగరం జిల్లాలో ప్రతిపాదిత గ్రీన్ స్టీల్ ప్లాంట్ ఏర్పాటుకు ఊతమిస్తూ, ప్రత్యేక ఆర్థిక రాయితీలు కల్పించే ప్రతిపాదనకు ఏపీ మంత్రివర్గం ఆమోదముద్ర వేసింది. అలాగే ఎలక్ట్రానిక్స్, సెమీకండక్టర్ తయారీ రంగాల్లో రాష్ట్రాన్ని కీలక కేంద్రంగా అభివృద్ధి చేసే లక్ష్యంతో సిలికాన్ క్రిస్టల్, వేఫర్ తయారీ యూనిట్ ఏర్పాటుకు 91.10 ఎకరాల భూమి కేటాయింపునకు గ్రీన్ సిగ్నల్ ఇచ్చింది. ఈ ప్రాజెక్టులు కార్యరూపం దాల్చితే ఉత్తరాంధ్రతో పాటు రాష్ట్రంలోని పారిశ్రామిక రంగానికి కొత్త ఊతం లభించే అవకాశం ఉంది. ఆధునిక తయారీ రంగంలో పెట్టుబడులను పెంచడం ద్వారా ఆర్థిక వృద్ధిని వేగవంతం చేయాలని ప్రభుత్వం భావిస్తోంది.
తుఫాన్ నష్టంపై సమీక్ష
మరోవైపు, ‘అర్నబ్’ తుఫాన్ ప్రభావంతో జరిగిన నష్టంపై కూడా మంత్రివర్గం సమీక్షించినట్లు సమాచారం. బాధిత కుటుంబాలకు తక్షణ సహాయం, పునరావాసం అందించడంతో పాటు దెబ్బతిన్న మౌలిక సదుపాయాలను త్వరగా పునరుద్ధరించాలని సీఎం చంద్రబాబు అధికారులకు సూచించినట్లు పేర్కొంది. అయితే పారిశ్రామిక పెట్టుబడులకు ప్రోత్సాహం, అత్యాధునిక తయారీ రంగాల విస్తరణ, తుఫాన్ బాధితులకు సహాయం.. ఈ మూడు అంశాలపై ఏపీ ప్రభుత్వం దృష్టి సారించింది. క్యాబినెట్ ఆమోదించిన ప్రతిపాదనలు ఎంత వేగంగా అమల్లోకి వస్తాయన్నది రాష్ట్ర అభివృద్ధి, ఉపాధి కల్పనలో కీలకంగా మారనుంది.
ALSO READ: Hyderabad Civil Court | కేటీఆర్‌పై అసత్య ఆరోపణలు చేయొద్దు.. కాంగ్రెస్ ఎమ్మెల్సీలకు కోర్టు ఆదేశం
