NTR Cookie Baking: వరుస సినిమాల కారణంగా బిజీగా ఉన్న యంగ్ టైగర్ ఎన్టీఆర్, ఖాళీ సమయాన్ని తన వ్యక్తిగత అభిరుచులకు వినియోగిస్తున్నారు. ముఖ్యంగా వంటగదిలో కొత్త వంటకాలు ప్రయత్నించడం ఆయనకు ఇష్టమైన హాబీగా మారింది. బిర్యానీ, నాటుకోడి కూర వంటి వంటకాల్లో ఆయనకు ప్రత్యేక నైపుణ్యం ఉందని అభిమానులు తరచుగా చెబుతుంటారు.
ఇటీవల ఎన్టీఆర్ తొలిసారిగా ఇంట్లో కుకీస్ తయారు చేసి ఆ అనుభవాన్ని సోషల్ మీడియాలో పంచుకున్నారు. “My First Bake #BakedNotBought” అనే క్యాప్షన్తో ఆయన పోస్ట్ చేయగా, అది వెంటనే అభిమానుల్లో వైరల్గా మారింది.
ఈ సందర్భంగా ఓ అభిమాని సరదాగా స్పందిస్తూ, “అన్నా.. మా ఇంట్లో ఇద్దరు చిన్న పిల్లలు ఉన్నారు. మా కోసం రెండు కుకీస్ పంపించగలరా?” అని కామెంట్ చేశాడు. దీనికి ఎన్టీఆర్ ఇచ్చిన స్పందన సోషల్ మీడియాలో మరింత హాట్ టాపిక్గా మారింది. ప్రముఖ హాస్యనటుడు బ్రహ్మానందం మీమ్లో వినిపించే “అడ్రస్ పెట్టు… ఫాస్ట్గా అడ్రస్ పెట్టు” అనే ఆడియోతో కూడిన వీడియోను ఆయన షేర్ చేశారు.
ఇక మరో అభిమాని, “బిర్యానీ, నాటుకోడి వంటల్లో పేరుగాంచిన మీరు ఇప్పుడు కుకీస్ ఎందుకు చేస్తున్నారు?” అని ప్రశ్నించగా, ఎన్టీఆర్ ‘బాద్షా’ సినిమాలోని బ్రహ్మానందం డైలాగ్ “మారాయి… అన్నీ మారాయి” అనే క్లిప్ను షేర్ చేసి సరదాగా స్పందించారు.
అంతటితో ఆగకుండా, ఆ అభిమానికి నిజంగానే కుకీస్ పంపించి సర్ప్రైజ్ ఇచ్చినట్లు సమాచారం. ఈ ఘటన అభిమానుల్లో మరింత ఉత్సాహాన్ని నింపింది. ఎన్టీఆర్ యొక్క హాస్య చతురత, వేగవంతమైన స్పందనలు సోషల్ మీడియాలో విస్తృతంగా ప్రశంసలు అందుకుంటున్నాయి.
తనదైన స్టైల్లో అభిమానులతో మమేకమవుతూ ఎన్టీఆర్ మరోసారి తన సింప్లిసిటీతో పాటు కామెడీ టైమింగ్ను కూడా ప్రదర్శించారు. దీంతో ఈ ఘటన నెట్టింట ట్రెండింగ్గా మారింది.
ALSO READ: India GDP | భారత్ GDP వృద్ధి 7.7% ఎలా సాధించింది? పెరుగుదల వెనుక అసలు కథ ఏమిటంటే ?
