YouTube New Rules: యూట్యూబ్లో కొత్త ఛానెల్ ప్రారంభించి ఆదాయం పొందాలని భావిస్తున్న వారికి సంస్థ కీలక ప్రకటన చేసింది. YouTube Partner Program (YPP) నిబంధనలను మరింత కఠినతరం చేస్తూ కొత్త అర్హత ప్రమాణాలను ప్రకటించింది. 2018 తర్వాత తొలిసారి ఈ స్థాయిలో మార్పులు తీసుకురావడం గమనార్హం. పెరుగుతున్న షార్ట్స్ వినియోగం, టీవీల్లో యూట్యూబ్ వీక్షణ సమయం భారీగా పెరగడంతో ఈ నిర్ణయం తీసుకున్నట్లు సంస్థ వెల్లడించింది. కొత్త మార్గదర్శకాల ప్రకారం 2027 ఫిబ్రవరి 1 నుంచి YPPలో చేరే కొత్త క్రియేటర్లు ప్రకటనలు, యూట్యూబ్ ప్రీమియం ద్వారా ఆదాయం పొందాలంటే గతంతో పోలిస్తే ఎక్కువ అర్హత సాధించాలి. లాంగ్-ఫామ్ వీడియోల కోసం 365 రోజుల్లో 8,000 గంటల వాచ్ టైమ్ అవసరం. అలాగే షార్ట్స్ విభాగంలో 90 రోజుల్లో 20 మిలియన్ వ్యూస్ తప్పనిసరి. అయితే 1,000 సబ్స్క్రైబర్ల నిబంధనలో ఎలాంటి మార్పు లేదు. ఇప్పటికే YPPలో ఉన్న క్రియేటర్లకు ఈ కొత్త ప్రవేశ నిబంధనలు వర్తించవని యూట్యూబ్ స్పష్టం చేసింది.
అదే సమయంలో షార్ట్స్ ద్వారా ప్రకటనల ఆదాయం కొనసాగాలంటే ప్రతి 90 రోజులకు కనీసం 10 మిలియన్ వ్యూస్ నిలబెట్టుకోవాలి. వ్యూస్ తగ్గితే షార్ట్స్ మోనిటైజేషన్ తాత్కాలికంగా నిలిచిపోతుంది. అయితే లాంగ్-ఫామ్ వీడియోల ద్వారా ఆదాయం కొనసాగుతుంది. ఇక 500 సబ్స్క్రైబర్లతో ఉన్న దిగువ స్థాయి YPP అర్హతలు యథాతథంగా కొనసాగనున్నాయి. అలాగే YouTube Premium Lite సేవను మరిన్ని దేశాలకు విస్తరిస్తూ, భారత్లో నెలకు రూ.89కే అందుబాటులో ఉంచినట్లు సంస్థ తెలిపింది.
