Digital Campaign: దేశ రాజకీయాల్లో సోషల్ మీడియా ప్రభావం రోజురోజుకూ పెరుగుతోంది. ముఖ్యంగా యువతను ప్రభావితం చేయడంలో ఏ వేదిక ఎక్కువ ప్రభావం చూపుతోందనే అంశంపై కేంద్ర ప్రభుత్వం ఇటీవల ప్రత్యేకంగా దృష్టి పెట్టినట్లు రాజకీయ వర్గాల్లో చర్చ జరుగుతోంది. తాజా పరిణామాల నేపథ్యంలో ఇన్స్టాగ్రామ్ను ప్రభుత్వ కమ్యూనికేషన్లో మరింతగా వినియోగించాలని ప్రధాని నరేంద్ర మోడీ నిర్ణయించారనే వార్తలు వెలువడ్డాయి.
ఇన్స్టాగ్రామ్పైనే ఎందుకు దృష్టి?
ఇటీవలి CJP పార్టీ ఆందోళనలు విద్యార్థి ఉద్యమాలు, ముఖ్యంగా నీట్కు సంబంధించిన నిరసనల్లో యువత ఎక్కువగా ఇన్స్టాగ్రామ్ను ఉపయోగించినట్లు భద్రతా సంస్థలు విశ్లేషించినట్లు సమాచారం. వాట్సాప్, ఫేస్బుక్, ఎక్స్, టెలిగ్రామ్తో పోలిస్తే రీల్స్, షార్ట్ వీడియోలు, విజువల్ కంటెంట్ ద్వారా సమాచారం వేగంగా వ్యాప్తి చెందడం ఇన్స్టాగ్రామ్ ప్రత్యేకతగా గుర్తించారు. ఈ కారణంగానే యువతతో ప్రత్యక్షంగా కమ్యూనికేట్ చేయడానికి ఇదే సరైన వేదికగా కేంద్రం భావిస్తున్నట్లు తెలుస్తోంది.
మోడీ వీడియోల వెనుక వ్యూహం ఏమిటి?
ఇటీవల ప్రధాని మోడీ ఇన్స్టాగ్రామ్లో వరుసగా వీడియో సందేశాలు విడుదల చేశారు. ప్రభుత్వ నిర్ణయాలు, వివాదాస్పద అంశాలపై తన అభిప్రాయాన్ని నేరుగా ప్రజలకు చేరవేయడానికి ఈ విధానాన్ని ఎంచుకున్నట్లు విశ్లేషకులు భావిస్తున్నారు. ముఖ్యంగా జెన్ జీ యువత ఎక్కువగా వినియోగించే ఫార్మాట్లో సందేశాలను అందించడం ద్వారా అపోహలను తగ్గించవచ్చనే ఆలోచన ఉందని చెబుతున్నారు.
మంత్రులకు కూడా ఇదే సూచనా?
ప్రభుత్వ పథకాలు, విజయాలు, కొత్త నిర్ణయాలను కేవలం ప్రెస్మీట్లు లేదా ఎక్స్ పోస్టులతో కాకుండా ఇన్స్టాగ్రామ్ రీల్స్, షార్ట్ వీడియోలు, ఇన్ఫోగ్రాఫిక్స్ రూపంలో ప్రజలకు చేరవేయాలని కేంద్ర మంత్రులకు సూచించినట్లు సమాచారం. యువతకు నచ్చే భాష, విజువల్ ప్రెజెంటేషన్పై కూడా దృష్టి పెట్టాలని సూచించినట్లు ప్రచారం జరుగుతోంది.
రాజకీయాలపై ఎలాంటి ప్రభావం?
ఇప్పటివరకు ఎన్నికల ప్రచారంలో వాట్సాప్, ఫేస్బుక్, యూట్యూబ్ కీలక పాత్ర పోషించగా, రాబోయే రోజుల్లో ఇన్స్టాగ్రామ్ మరింత ప్రాధాన్యం పొందే అవకాశం ఉందని రాజకీయ విశ్లేషకులు అంచనా వేస్తున్నారు. యువ ఓటర్లతో ప్రత్యక్ష అనుసంధానం, వేగంగా సమాచార ప్రసారం, వీడియో ఆధారిత కమ్యూనికేషన్ వంటి అంశాలు రాజకీయ పార్టీల డిజిటల్ వ్యూహాలను మార్చే అవకాశముందని వారు అభిప్రాయపడుతున్నారు.
ALSO READ: Gulveer Singh | కామన్వెల్త్లో చరిత్ర సృష్టించిన భారత అథ్లెట్.. తొలి భారతీయుడిగా సిల్వర్!
