VB GRMG | తెలంగాణకు భారీ నిధులు.. గ్రామీణ పథకానికి కేంద్రం నిధుల మంజూరు

కేంద్ర ప్రభుత్వం తెలంగాణకు గ్రామీణ అభివృద్ధి కోసం భారీ నిధులు కేటాయించింది. మహాత్మా గాంధీ జాతీయ గ్రామీణ ఉపాధి హామీ పథకం స్థానంలో జులై 1 నుంచి అమల్లోకి రానున్న కొత్త వీబీ జీరామ్‌జీ (VB GRMG) పథకం కింద 2026–27 ఆర్థిక సంవత్సరానికి రాష్ట్రానికి రూ.3,825.31 కోట్లను కేటాయిస్తూ కేంద్ర పంచాయతీరాజ్, గ్రామీణాభివృద్ధి శాఖ ఉత్తర్వులు జారీ చేసింది.

కేంద్ర ప్రభుత్వం విడుదల చేసిన ఈ నిధులు మొత్తం వ్యయంలో 60 శాతం వాటాగా ఉంటాయి. వచ్చే తొమ్మిది నెలల వ్యవధిలో కొత్త పథకం ద్వారా రాష్ట్రంలో గ్రామీణాభివృద్ధి పనులు కొనసాగించనున్నారు. ఈ కాలానికి మొత్తం రూ.6,375.52 కోట్ల వ్యయం అవసరమని అంచనా వేయగా, అందులో కేంద్రం వాటాగా రూ.3,825.31 కోట్లు విడుదల చేయనుంది.

మిగిలిన 40 శాతం నిధులను రాష్ట్ర ప్రభుత్వం భరించాల్సి ఉంటుంది. మొత్తం వ్యయంలో రాష్ట్ర ప్రభుత్వం తన భాగస్వామ్యంగా రూ.2,550.21 కోట్లను అందించనుంది. ఈ నిధులతో గ్రామీణ ప్రాంతాల్లో ఉపాధి కల్పన, అభివృద్ధి పనులు, మౌలిక వసతుల మెరుగుదల వంటి కార్యక్రమాలు చేపట్టనున్నారు.

జులై 1 నుంచి అమల్లోకి రానున్న ఈ కొత్త పథకం ద్వారా కేంద్ర–రాష్ట్ర భాగస్వామ్యంతో గ్రామీణాభివృద్ధి పనులు మరింత వేగవంతం కానున్నాయని అధికారులు పేర్కొన్నారు. ఉపాధి అవకాశాలను పెంచడం, గ్రామీణ ఆర్థిక వ్యవస్థను బలోపేతం చేయడం ఈ పథకం ప్రధాన లక్ష్యాలుగా ఉన్నాయి.