LIVE
Thursday, November 19, 2026
LIVE
LIVE

Cheyutha Pension | కోటి మంది మహిళలకు ఇందిరమ్మ చీరలు.. 4.63 లక్షల మందికి కొత్త పెన్షన్లు

by Bajaswamy
4 views
Indiramma Saree Cheyutha Pension

Cheyutha Pension: తెలంగాణలో సంక్షేమ పథకాల అమలుపై ప్రభుత్వం కీలక మార్పులు చేసింది. మహిళలకు అందించాల్సిన ఇందిరమ్మ చీరలు, కొత్తగా మంజూరైన చేయూత పెన్షన్ల నగదు పంపిణీ కోసం ఎదురుచూస్తున్న లబ్ధిదారులకు తాజా సమాచారం వెలువడింది. ముందుగా నవంబర్ 19న ప్రారంభించాలనుకున్న ఈ రెండు కార్యక్రమాలను ప్రభుత్వం వాయిదా వేసింది. అయితే ఇందిరమ్మ కుటుంబ బీమా పథకం ప్రారంభానికి మాత్రం ఎలాంటి మార్పు చేయలేదు. ముఖ్యమంత్రి రేవంత్ రెడ్డి నవంబర్ 19న సిద్దిపేట జిల్లాలో పర్యటించనున్నారు. అక్కడ నిర్వహించే బహిరంగ సభలో ఇందిరమ్మ కుటుంబ బీమా పథకానికి సంబంధించిన దరఖాస్తుల స్వీకరణ ప్రక్రియను ప్రారంభించనున్నారు. తొలుత ఇదే వేదికపై రెండో విడత ఇందిరమ్మ చీరల పంపిణీ, కొత్త చేయూత పెన్షన్ల నగదు జమ కార్యక్రమాలను కూడా ప్రారంభించాలని ప్రభుత్వం భావించింది. అయితే తాజా నిర్ణయంతో ఆ రెండు కార్యక్రమాలను నవంబర్ 26కు మార్చింది.

రాజ్యాంగ దినోత్సవం సందర్భంగా నవంబర్ 26న రెండో విడత ఇందిరమ్మ చీరల పంపిణీ చేపట్టనున్నారు. ఈ విడతలో రాష్ట్రవ్యాప్తంగా కోటి మంది మహిళలకు చీరలు అందించాలని ప్రభుత్వం లక్ష్యంగా పెట్టుకుంది. మరోవైపు కొత్తగా మంజూరైన 4,63,857 మంది చేయూత పెన్షన్ లబ్ధిదారుల ఖాతాల్లో కూడా నగదు జమ చేయనుంది. దీంతో కొత్తగా పెన్షన్లు పొందనున్న వారికి ఆర్థిక భరోసా కలగనుంది. ఇక ఇందిరమ్మ కుటుంబ బీమా పథకం ద్వారా రాష్ట్రంలోని కోటి కుటుంబాలకు రూ.5 లక్షల వరకు జీవిత బీమా రక్షణ కల్పించాలని ప్రభుత్వం నిర్ణయించింది. ఈ పథకం అమలుతో ఉపాధి హామీ కూలీలు సహా పేద కుటుంబాలకు ప్రయోజనం చేకూరనుంది. ఇప్పటికే వివిధ ప్రభుత్వ శాఖల ద్వారా అమలవుతున్న బీమా పథకాలన్నింటినీ ఒకే గొడుగు కిందకు తీసుకురావాలని సీఎం అధికారులను ఆదేశించారు.

ప్రస్తుతం కొన్ని శాఖల్లో అమలవుతున్న రూ.2 లక్షల జీవిత బీమా ప్రయోజనాన్ని రూ.5 లక్షలకు పెంచేలా చర్యలు తీసుకోవాలని సూచించారు. ఇప్పటికే ప్రభుత్వ బీమా పథకాల ద్వారా ప్రయోజనం పొందుతున్న ఒక్కరినీ కూడా కొత్త విధానంలో మినహాయించకూడదని స్పష్టం చేశారు. ప్రమాద బీమా ప్రయోజనాలు కూడా యథావిధిగా కొనసాగించాలని ఆదేశించారు. మొత్తంగా చూస్తే.. నవంబర్ 19న ఇందిరమ్మ కుటుంబ బీమా పథకం ప్రారంభం కానుండగా, ఇందిరమ్మ చీరలు, కొత్త చేయూత పెన్షన్ల పంపిణీకి నవంబర్ 26 తేదీని ప్రభుత్వం ఖరారు చేసింది. ఈ కార్యక్రమాల అమలుతో రాష్ట్రంలోని మహిళలు, పేద కుటుంబాలు, కొత్త పెన్షన్ లబ్ధిదారులకు ప్రయోజనం కలగనుంది.

banner
banner

You may also like

Leave a Comment

This website uses cookies to improve your experience. We'll assume you're ok with this, but you can opt-out if you wish. Accept Read More