Telangana Government Jobs: తెలంగాణలో ప్రభుత్వ ఉద్యోగాల కోసం ఎదురుచూస్తున్న నిరుద్యోగ యువతకు రాష్ట్ర ప్రభుత్వం కీలక శుభవార్త ప్రకటించింది. ప్రభుత్వ ఉద్యోగ నియామకాలలో గరిష్ఠ వయోపరిమితిని మరో పదేళ్లు పెంచుతూ ప్రభుత్వం నిర్ణయం తీసుకుంది.
దీనికి సంబంధించిన అధికారిక ఉత్తర్వులను ప్రభుత్వ ప్రధాన కార్యదర్శి కె. రామకృష్ణారావు విడుదల చేశారు. ఇప్పటివరకు సాధారణ ప్రభుత్వ ఉద్యోగాలకు దరఖాస్తు చేసుకునే అభ్యర్థులకు గరిష్ఠ వయోపరిమితి 34 ఏళ్లుగా ఉండగా, తాజా నిర్ణయంతో దాన్ని 44 ఏళ్లకు పెంచారు.
తెలంగాణ రాష్ట్ర ఏర్పాటుకు తర్వాత ఉద్యోగ నియామకాల ప్రక్రియలో ఆలస్యం జరగడం, కరోనా కారణంగా పరీక్షలు, నోటిఫికేషన్లు వాయిదా పడటం వల్ల అనేక మంది అభ్యర్థులు వయోపరిమితి దాటిపోయారు. దీంతో ప్రభుత్వం ప్రత్యేక సడలింపు ఇవ్వాలని నిరుద్యోగ యువత పెద్ద ఎత్తున డిమాండ్ చేసింది. ఈ నేపథ్యంలో ప్రభుత్వం వయోపరిమితిపై పదేళ్ల సడలింపుని అమలు చేయాలని నిర్ణయించింది.
రాష్ట్రంలోని వివిధ నియామక సంస్థలు విడుదల చేసే సాధారణ ప్రభుత్వ ఉద్యోగాలన్నింటికీ ఈ నూతన నిబంధన వర్తించనుంది. అయితే యూనిఫాం సర్వీసులకు ఈ సడలింపు వర్తించదని ప్రభుత్వం స్పష్టం చేసింది.
పోలీస్, అగ్నిమాపక, మద్యం నియంత్రణ, జైలు, అటవీ శాఖల వంటి శారీరక దారుఢ్య పరీక్షలు అవసరమైన ఉద్యోగాలకు ప్రస్తుతం అమల్లో ఉన్న పాత వయోపరిమితి నిబంధనలే కొనసాగనున్నాయి. ఈ నిర్ణయం వల్ల వేలాది మంది నిరుద్యోగ యువతకు ప్రభుత్వ ఉద్యోగాల కోసం మరో అవకాశం లభించనుంది.
