Irumudi Kattu: వరుస చిత్రాలతో ప్రేక్షకుల ముందుకు వస్తున్న హీరో రవితేజ, ఇటీవల ఆశించిన విజయాన్ని అందుకోలేకపోయినా ప్రస్తుతం కొత్త ప్రాజెక్టుతో మళ్లీ ప్రేక్షకుల దృష్టిని ఆకర్షిస్తున్నారు. ఆయన నటిస్తున్న తాజా చిత్రం ‘ఇరుముడి’ షూటింగ్ మరియు ప్రమోషన్ కార్యక్రమాల్లో వేగం పెంచింది. అయ్యప్ప స్వామి నేపథ్యాన్ని ఆధారంగా చేసుకుని రూపొందుతున్న ఈ సినిమాలో తండ్రి–కూతురు మధ్య ఉన్న భావోద్వేగ అనుబంధాన్ని ప్రధానంగా చూపించనున్నారు.
ఈ చిత్రం ఆగస్టు 21న థియేటర్లలో విడుదల చేయనున్నట్లు చిత్రబృందం అధికారికంగా ప్రకటించింది. ఇటీవలే విడుదల తేదీని వెల్లడించిన మేకర్స్, ఇప్పుడు ప్రమోషన్స్లో భాగంగా మొదటి పాటను ప్రేక్షకుల ముందుకు తీసుకొచ్చారు. ‘ఇరుముడి కట్టు’ పేరుతో విడుదలైన ఈ గీతం భక్తి భావాన్ని ప్రతిబింబించేలా రూపొందించబడి. అయ్యప్ప భక్తుల్లో ఇప్పటికే ప్రాచుర్యం పొందిన సంప్రదాయ గీతంలోని కొన్ని పంక్తులను ఈ పాటలో ఉపయోగించినప్పటికీ, మొత్తం సంగీతాన్ని కొత్తగా రూపొందించారు.
ముఖ్యంగా ‘స్వామియే అయ్యప్పో.. అయ్యప్పో స్వామియే’ అనే భాగాన్ని యథాతథంగా ఉంచడంతో పాటకు ప్రత్యేకమైన భక్తి వాతావరణం వచ్చింది. కొత్త సంగీత సమీకరణతో రూపొందిన ఈ పాట వినడానికి ఆకట్టుకునేలా ఉందని ప్రేక్షకుల స్పందన కనిపిస్తోంది. చిత్రంలో రవితేజ సరసన ప్రియా భవానీ శంకర్ కథానాయికగా నటిస్తుండగా, శివ నిర్వాణ దర్శకత్వం వహిస్తున్నారు. జీవీ ప్రకాశ్ కుమార్ సంగీతాన్ని అందిస్తున్నారు.
