Delhi Police FIRs: ఓటర్ల జాబితా సవరణ అంశం ఢిల్లీలో రాజకీయ ఉద్రిక్తతకు దారితీసింది. కేంద్ర ఎన్నికల సంఘం చేపట్టిన ప్రత్యేక సమగ్ర సవరణ (SIR) ప్రక్రియను వ్యతిరేకిస్తూ విపక్ష కూటమి నిర్వహించిన ప్రదర్శనపై ఢిల్లీ పోలీసులు కేసులు నమోదు చేశారు. ఈ వ్యవహారంలో మొత్తం నాలుగు ఎఫ్ఐఆర్లు నమోదైనట్లు పోలీసు వర్గాలు వెల్లడించాయి. అక్టోబర్ 12న లోక్సభ ప్రతిపక్ష నేత రాహుల్ గాంధీ నేతృత్వంలో ఇండియా కూటమి నాయకులు, ఎంపీలు కాన్స్టిట్యూషన్ క్లబ్ నుంచి సుప్రీంకోర్టు వైపు ర్యాలీ నిర్వహించారు. ఈ ప్రదర్శనకు సంబంధించి అమలులో ఉన్న నిషేధాజ్ఞలను ఉల్లంఘించారనే ఆరోపణలతో పోలీసులు చర్యలు చేపట్టారు.
పోలీసుల సమాచారం ప్రకారం తిలక్ మార్గ్ పోలీస్ స్టేషన్లో రెండు కేసులు, మందిర్ మార్గ్, బారాఖంబా రోడ్ పోలీస్ స్టేషన్లలో ఒక్కో కేసు నమోదయ్యాయి. అనుమతి లేని ప్రాంతాల్లోకి వెళ్లడం, బారికేడ్లు దాటడం, ట్రాఫిక్కు ఆటంకం కలిగించడం వంటి ఆరోపణలు ఎఫ్ఐఆర్లలో పేర్కొన్నట్లు సమాచారం. నగరంలో శాంతిభద్రతల పరిరక్షణ కోసం అమల్లో ఉన్న బీఎన్ఎస్ఎస్ సెక్షన్ 163 నిబంధనలను ఉల్లంఘించినట్లు పోలీసులు ఆరోపిస్తున్నారు. SIR అంశంపై విపక్షాల నిరసనతో ప్రారంభమైన ఈ పరిణామం ఇప్పుడు పోలీసు కేసుల వరకు చేరింది. నమోదైన కేసులపై తదుపరి చర్యలు, విపక్ష నేతల స్పందన ఎలా ఉంటాయన్నది రాజకీయ వర్గాల్లో ఆసక్తికరంగా మారింది.
ALSO READ: Bathukamma celebrations Hyderabad | పూలను పూజించే పండుగ.. బతుకమ్మ సంబరాల్లో మహిళల కోలాహలం
