IndianHandicrafts: ప్రపంచ దేశాలతో దౌత్య సంబంధాలను మరింత బలోపేతం చేసుకుంటూనే భారతీయ సంస్కృతి, సంప్రదాయాలకు అంతర్జాతీయ వేదికపై ప్రత్యేక గుర్తింపు తీసుకొస్తున్నారు ప్రధాని నరేంద్ర మోడీ. ఫిలిప్పీన్స్ రాజధాని మనీలాలో రెండు ప్రాంతీయ శిఖరాగ్ర సదస్సుల్లో పాల్గొనేందుకు చేరుకున్న ఆయన.. పలువురు ప్రపంచ దేశాధినేతలకు భారతీయ కళా వైభవాన్ని చాటిచెప్పే అరుదైన కానుకలను అందించారు. ఒక్కో రాష్ట్రానికి ప్రత్యేకమైన హస్తకళలు, వస్త్ర సంప్రదాయాలు, శిల్పకళా నైపుణ్యాలను ప్రతిబింబించేలా ఈ బహుమతులను ఎంపిక చేశారు. దీంతో మోడీ అందించిన కానుకలు ప్రత్యేక ఆకర్షణగా నిలిచాయి. అమెరికా అధ్యక్షుడు డొనాల్డ్ ట్రంప్కు రాజస్థాన్కు ప్రత్యేకమైన గోల్డెన్ పిచ్వాయ్ పెయింటింగ్ను బహూకరించారు. సంప్రదాయ వస్త్ర చిత్రకళతో రూపొందిన ఈ కళాఖండంలో బంగారు పూత ప్రత్యేక ఆకర్షణగా నిలుస్తుంది. రంగులు, అలంకరణలతో భారతీయ చిత్రకళా వైభవాన్ని ఇది ప్రతిబింబిస్తుంది.
ఫిలిప్పీన్స్ అధ్యక్షుడు ఫెర్డినాండ్ మార్కోస్ జూనియర్కు కశ్మీరీ పట్టు తివాచీని అందించారు. చేతితో నేసిన ఈ తివాచీ మృదుత్వం, మెరుపుతో ప్రత్యేక గుర్తింపు పొందింది. దీని తయారీకి నిపుణులు ఎంతో సమయం, శ్రమ వెచ్చిస్తారు. ఇండోనేషియా అధ్యక్షుడు ప్రబోవో సుబియాంటోకు చోళుల కాలం నాటి కాంస్య శిల్పాన్ని అందించారు. 9వ శతాబ్దం నుంచి 13వ శతాబ్దం మధ్య దక్షిణ భారతదేశంలో విలసిల్లిన చోళ శిల్పకళా సంప్రదాయానికి ఇది ప్రతీకగా నిలుస్తుంది.
కంబోడియా ప్రధాని హున్ మానెట్కు ఢోక్రా కళతో రూపొందించిన అలంకార పడవను బహూకరించారు. స్వచ్ఛత, శ్రేయస్సు, ఆతిథ్యానికి ప్రతీకగా భావించే ఈ కళారూపం సంప్రదాయ లోహపు పనితనాన్ని చాటిచెబుతుంది. మయన్మార్ అధ్యక్షుడు మిన్ ఆంగ్ హ్లైంగ్కు జింక్, రాగి మిశ్రమంతో రూపొందించే బిద్రీవేర్ కళాఖండాలను అందించారు. లోహంపై వెండి అలంకరణలతో రూపొందించే ఈ కళకు ప్రత్యేకమైన చారిత్రక గుర్తింపు ఉంది. జపాన్ ప్రధాని సనాయే తకైచికి రాయల్ బ్లూ బనారసి పట్టు శాలువాను బహూకరించారు. శతాబ్దాల చరిత్ర కలిగిన బనారస్ వస్త్రకళలోని నైపుణ్యం, నాణ్యత ఈ శాలువాలో ప్రతిబింబిస్తాయి. ఆస్ట్రేలియా ప్రధాని ఆంథోనీ అల్బనీస్కు జైపూర్ నీలిరంగు మట్టిపాత్ర కళాఖండాన్ని అందించారు. రాజస్థాన్కు చెందిన ఈ ప్రత్యేక కళాకృతి అందమైన రంగులు, ఆకర్షణీయమైన డిజైన్లతో ప్రసిద్ధి చెందింది.
మోడీ అందించిన ఈ కానుకలు కేవలం బహుమతులకే పరిమితం కాలేదు. భారతదేశంలోని వివిధ ప్రాంతాల కళలు, కళాకారుల నైపుణ్యం, తరతరాలుగా కొనసాగుతున్న సంప్రదాయాలకు అంతర్జాతీయ గుర్తింపు తీసుకొచ్చే ప్రయత్నంగా నిలిచాయి. దౌత్య సంబంధాల మధ్య సాంస్కృతిక అనుబంధాన్ని పెంపొందిస్తూ.. ‘వైవిధ్యంలో ఏకత్వం’ అనే భారతీయ ప్రత్యేకతను ప్రపంచ దేశాలకు మరోసారి పరిచయం చేశాయి.
