PM Modi: పశ్చిమాసియాలో యుద్ధ పరిస్థితులు ప్రపంచ దేశాలపై ప్రభావం చూపుతున్న వేళ.. భారత్‌లోనూ గ్యాస్, ఎరువుల కొరత ఏర్పడుతుందనే చర్చ రాజకీయంగా వేడెక్కుతోంది. ఈ నేపథ్యంలో ప్రధాని నరేంద్ర మోడీ ప్రతిపక్షాలపై తీవ్రస్థాయిలో విరుచుకుపడ్డారు. ప్రజల్లో భయాందోళనలు కలిగించేలా తప్పుడు ప్రచారం చేస్తున్నాయని ఆరోపించారు. గుజరాత్‌లోని బనస్కాంతలో శుక్రవారం జరిగిన కార్యక్రమంలో మోడీ మాట్లాడుతూ ఇరాన్ యుద్ధం, గల్ఫ్ ప్రాంత ఉద్రిక్తతలను ఆసరాగా చేసుకుని కొందరు రాజకీయ పార్టీలు గ్యాస్, ఎరువుల కొరతపై పుకార్లు వ్యాప్తి చేస్తున్నాయని విమర్శించారు. దేశం క్లిష్ట పరిస్థితులను ఎదుర్కొంటున్నప్పుడు ప్రభుత్వానికి సహకరించాల్సింది పోయి, రాజకీయ ప్రయోజనాల కోసం ప్రజలను ఆందోళనకు గురిచేస్తున్నారని మండిపడ్డారు. అభివృద్ధి చెందిన భారత్ లక్ష్యంగా యువత, మహిళలు కృషి చేస్తుంటే.. కొందరు మాత్రం దేశ పురోగతిని కోరుకోవడం లేదని వ్యాఖ్యానించారు.
రైతులకు భరోసా ఇచ్చిన ప్రధాని
అంతర్జాతీయ మార్కెట్లో ఎరువుల ధరలు పెరుగుతున్నప్పటికీ, ఆ ప్రభావం భారత రైతులపై పడకుండా ప్రభుత్వం చర్యలు తీసుకుంటోందని మోడీ తెలిపారు. రైతులకు ఇచ్చిన హామీ మేరకు కష్టకాలంలోనూ అండగా ఉంటామని స్పష్టం చేశారు. వ్యవసాయ రంగంలో ఆధునిక సాంకేతికతను ప్రోత్సహిస్తున్నామని చెబుతూ సాయిల్ హెల్త్ కార్డు పథకాన్ని ప్రస్తావించారు. ఇప్పటివరకు దేశవ్యాప్తంగా 26 కోట్లకు పైగా సాయిల్ హెల్త్ కార్డులు పంపిణీ చేసినట్లు వెల్లడించారు. వీటి ద్వారా భూమిలోని పోషకాలను తెలుసుకుని, అవసరమైన ఎరువులను మాత్రమే వినియోగించుకునే అవకాశం రైతులకు కలుగుతోందన్నారు.
కొత్త విత్తనాలతో వ్యవసాయానికి ప్రోత్సాహం
వాతావరణ మార్పులను తట్టుకునేలా గత కొన్నేళ్లలో దాదాపు 3,000 కొత్త విత్తన రకాలను రైతులకు అందుబాటులోకి తీసుకొచ్చినట్లు ప్రధాని వెల్లడించారు. వ్యవసాయంతో పాటు పశుపోషణ, డెయిరీ రంగాల్లోనూ సైన్స్, టెక్నాలజీ వినియోగాన్ని పెంచుతున్నామని వివరించారు. గ్రామీణ ఆర్థిక వ్యవస్థ బలోపేతంలో పశుపోషణ, పాల ఉత్పత్తి రంగాలు కీలకమని, ముఖ్యంగా మహిళల భాగస్వామ్యం ఎంతో ముఖ్యమని పేర్కొన్నారు. మెరుగైన పశు జాతుల అభివృద్ధితో పాల ఉత్పత్తిని మరింత పెంచుకోవచ్చని తెలిపారు. మొత్తంగా, అంతర్జాతీయ పరిణామాల నేపథ్యంలో దేశంలో గ్యాస్, ఎరువుల సరఫరాపై ఆందోళనలు వ్యక్తమవుతున్న వేళ.. రైతులకు భరోసా కల్పించడంతో పాటు ప్రతిపక్షాల ప్రచారంపై మోడీ ఎదురుదాడికి దిగారు. ఈ అంశం రానున్న రోజుల్లో రాజకీయంగా మరింత చర్చకు దారితీసే అవకాశం ఉంది.
